UMongameli Robert Mugabe ukhangelelwe ukuthi uzakwethula umbiko wakhe emhlanganweni wamazwe omhlaba oweUnited Nations General Assembly ngoLwesithathu ngesikhathi ezinye izizalwane zeZimbabwe zisithi akuqakathekanga azakukhuluma.
UMugabe njengenhlalayenza ukhangelelwe ukuthi uzathuka inkokheli yamazwe athuthukileyo ajayele ukuwathethisela ukuthi afuna umnotho wezwekazi leAfrica njalo achothoza umbuso wocuku onjengowakhe.
UMugabe owayejayele ukuthatha isikhathi eside esethula umbiko wakhe, kukhanya kulezi insuku ubeka amazwi amalutshwana ngenxa yokuthi usekhulile.
Inkhokheli yamanye amazwe ezakhuluma emhlanganweni lo lamuhla igoqela uMongameli Edgar Chagwa Lungu weZambia osanda kukhethwa nguzulu loba kulabanye abakhononayo, umongameli weSouth Africa uMnu. Jacob Zuma loMnu. Arthur Peter Mutharika umongameli weMalawi, labanye abafika amatshumi amathathu lantathu.
UMongameli Barack Obama wethule umbiko wakhe ngoLwesibili emhlanganweni lo lapho athe kumele kuphele okwenziwa ngabanothileyo abafihla imali kwamanye amazwe uzulu esidla ingqweqwe zomlomo.
“Labo abathola abakufunayo kwezomnotho emhlabeni jikelele bajayele ukusebenzisa amandla abo kwezombusazwe ngokuqhubeka bencindezela izisebenzi. Emazweni athuthukayo izisebenzi ziyancindezelwa kakhulu. Okunye okwenza izisebenzi ezinengi zingathuthuki yikufumbathisana lokungavezeli imali uzulu yentuthuko.
“Kusenjalo, banengi abafihla imali yabo endaweni ezingaqedakaliyo okwenza ukuthi badle bodwa batshiye uzulu esidla ingqweqwe zomlomo. Kulemali efika ku $8 trillion efakwa emabhanga angaqedakaliyo.”
Uqhubeke esithi, “Akuphileki kahle emhlabeni lapho okulabantu abayisilinganiso sokunye ekhulwini – 1 percent ababambe umnotho abantu makhaza bona bethwele nzima.
“Kumele njalo sibe labohulumende ababuswa ngabantu. Ngiyakwazi ukuthu ohulumende abalapha bangeke benza okufanayo njalo ele melika lingeke litsho ukuthi kumele benzeni. Kukhanya khathesi kulokulwisana phakathi kokubusa kukazulu lokubuswa yilabo abaphethe intambo. Mina ngibona engani kumele ohulumende bebuswe ngabantu njalo bahloniphe ilungelo likazulu.”
UMnu. Nkululeko Sibanda, ingcwethi kwezombusazwe osekolitshini le Huddersfield University eBhilithane, utshele iStudio 7 ukuthi uMugabe ukhangelelwe ukuthi uzathethisa inkokheli yamazwe athuthukileyo emhlanganweni weUnited Nations General Assembly.
Siphinde saxhuma uMnu. Joseph Tshuma, omele iPelandaba-Mpopoma kudale lephalamende ekubandla leZanu PF, othe uMugabe uzakhulumela abantu makhaza kuzwekazi leAfrica.
