Umbukiso wezamabhizimusi lokuthengiselana oweZimbabwe International Trade Fair (ZITF) walonyaka ungene kulanga lesibili edolobheni lakoBulawayo ngoLwesithathu.
Bekulusuku njalo olwenziwa umhlangano omkhulu wabosomabhizimusi oqhutshwa ngabenkampani yeZITF bemanyene labeNational Economic Consultative Forum.
Bekulilanga lesibili labamabhizimusi embukisweni oweZITF 2019 lapho osomabhizimusi abakade bephakathi kokudinga ukuthengisa abakulungisayo kumbe inhlelo zabo.
Abenkampani yeZITF bemanyene labeNational Economic Consultative Forum baqoqe umhlangano labosomabhizimusi ovulwe okusemthethweni nguMsekeli kaMongameli uRetired General Constantino Chiwenga.
UChiwenga uthembise osomabhizimusi ukuba uHulumende uzasebenza gadalala ekuvuseleleni umnotho kanye lokuqeda umkhuba wenkohlakalo ophazamisa isimo somnotho ukuze ilizwe liphume ebuyangeni.
UMgcinisihlalo weZITF, uNkosikazi Ruth Ncube, uthe umbukiso walonyaka uhamba kahle njalo amalungiselelo okwaka iwetela yeZITF asefike esibangeni esiphezulu.
"Umbukiso uqhubekela phambili kahle kakhulu siyathokoza ngokuza kwabantu abazobukisa. Abantu bonke abazobukisa sebelapha abasuka kumabhizimusi ahlukeneyo sijabulile ngokuza kwabantu. Amalungiselelo okwakha iwetela yeZITF asefike esibangeni esiphezulu njalo uhulumende okwamanje uphakathi kokuhlolisisa ukuba salandela na imithetho yokusungula lokufeza ukwakhiwa kwewetela yethu."
USenator wakoBulawayo uNkosikazi Mildred Dube uthi ukhangelele ukuphakama kwamabhizimusi.
“Umbukiso walonyaka ngiwubona engathi uyaphakama kuminyaka edlule ubusiwa. Kusizwisa ubuhlungu ngokuvalwa kwamabhizimusi akoBulawayo evalwa esiyaqala eHarare."
Umbukiso walonyaka uqhutshwa ngaphansi kwesihloko esithi ‘Propagating Industrial Growth Through Trade and Investment’.
Umbukiso weZITF 2019 wabosomabhizimusi oqale ngoLwesibili uyaphela ngoLwesine kuthi ngoLwesihlanu kusiya ngoMqgibelo uzavulelwa uzulu.
Umphathintambo wezemali, uMnu. Mthuli Ncube, laye ungene lumhlanano lapho athembise uzulu ukuba njengohulumende bakhangelele ukuba kusiyaphela umnyaka isimo somnotho welizwe sibe sesithuthukile kulandela inhlelo ezikhona zokuwuvuselela.
UMongameli Yoweri Museveni weleUganda nguye ozavula okusemthethweni umbukiso walonyaka owe ZITF 2019 ngoLwesihlanu.
Amankampani edlula amakhulu amahlanu i532 aweZimbabwe ayabukisa kuthi amazwe alitshumi lambili abalisa iBotswana, Ethopia, Japan, Kenya, Malawi, Mozambique, Namibia, Nigeria, South Africa, United Arab Emirates, United States of America leZambia ayabukisa lonyaka.