IZimbabwe Electoral Commission (ZEC) ithi isimise inhlelo ezinengi ngenxa yomkhuhlane weCoronavirus COVID-19.
Ikhomishini le yethule umbiko lo ngoMgqibelo isithi kayisoze yenelise ukuqhuba ukhetho ngesikhathi ilizwe leZimbabwe libhekane leCOVID-19.
IZEC ithi kukhanya engani amabandla alakho ukuvala izikhexe edale lephalamende ezitshiywe ngamalunga abo ngokukhetha abalandeli abangabamela kusetshenziswa okuthiwa yi-proportional representation hatshi ukuthi kwenziwe ukhetho.
Ibandla leMDC-T elikhokhelwa nguNkosazana Thokozani Khuphe lisanda kuxotshisa amanye amalunga edale lephalamende akumanyano weMDC Alliance.
UMaKhupe uthi ibandla lakhe lilandela okwethulwa ngumthethwandaba owathi akwenziwanga ngemfanelo ukukhethwa kuka Mnu. Nelson Chamisa ngumuyi uMorgan Tsvangirai ngakho-ke akumelanga akhokhele ibandla leMDC.
Kasenelisanga ukukhuluma ngodaba lokhetho leziphathamandla zekhomishini yeZEC ngenxa yokuthi uMnu. Etoile Silayigwana, umqondisi wayo, ubengaphenduli umakhalekhukhwini wakhe.
Kusenjalo, lokhu bephoselana aqatha abakubandla leMDC-T lomanyano weMDC Alliance kulandela ukuhluthunwa kwesakhiwo seMorgan Richard Tsvangirai House libandla lika MaKhupe kunsukwana ezisanda kwedlula.
Bazonde okumangalisayo abalandeli baka Mnu. Nelson Chamisa abathi uMaKhupe uyadelela. Ukuze sizwe okunengi ngodaba lolu, sixoxe loMnu. Witness Dube, okubandla leMDC-T, loMnu. Edwin Ndlovu, umlandeli womanyano weMDC Alliance.
UDube uthe ngamanga aluhlaza tshoko ukuthi sebedlelana lebandla elibusayo. Lokhu kuphikiswe nguNdlovu othi kusobala ukuthi abakwenzayo kusekelwa libandla elibusayo ngoba kabalamandla okwenza konke lokhu bengancediswa nguhulumende.
