amalinks wokungena

Breaking News

Nelson Chamisa: Kumele Kube Lohulumende Omutsha Ozalungisa Umnotho weZimbabwe


Nelson Chamisa of the MDC
Nelson Chamisa of the MDC

Umkhokheli webandla eliphikisayo eleMovement for Democratic Change (MDC), uMnu. Nelson Chamisa, uthi kumele kubunjwe uhulumende ozaphatha intambo okwesikhatshana kwele Zimbabwe ngenxa yokuthi uMongameli Emmerson Mnangagwa uyehluleka ukubusa.

UChamisa okhulume lentathelizindaba ngoLwesibili eHarare, uthe lokhu kuvezwa yikukhuphuka mahlayana kwentengo yempahla etshiyeneyo lokusilela kweyinye impahla okwenziwe yikugugudeka kohlobo lwemali yama bond notes.

“Okokuqala kumele siphendle indlela yokukhulumisana … Kumele sibelohulumende ozaphatha intambo okwezikhatshana ozalungisa konke lokhu okuhluphayo elizweni.”

Uthe ibandla lakhe lizimisele ukukhulumisana lelibusayo ngokwenzakala kwele Zimbabwe lobanje bengasifisi ukuthi benze engani uMongameli Emmerson Mnangagwa wanqoba kukhetho lukamongameli olwenziwa lonyaka ngoNtulikazi.

“Sizimisele ukuthi sikhulume. Sizakhuluma nomakanjani ngoba kumele silungise okuhlupha ilizwe lethu. Kodwa-ke akumelanga sibanjwe ngamandla ukuthi sithi uhulumende okhona wangena ngemfanelo esikhundleni.”

Impahla etshiyeneyo ikhuphuka intengo okungapheliyo kuthi eyinye egoqela isinkwa, amafutha okupheka lokunye kayisatholakali ezitolo.

UChamisa uthe ngaphandle kwalokhu, abantu bathwele nzima ezibhedlela lapho okungela maphilisi lokunye okufunakalayo.

“Abantu bayahlupheka. Abantu bayakwazi ukuhlupheka lokhu lokugugudeka komnotho. Kuyesabeka okusezibhedlela. Zifile izibhedlela. Akulamithi yokwelapha abantu. Akulalutho. Izibhedlela ngokwazo ziyagula. Abantu bayagula. Izibhedlela ezigulayo zingeke zelapha abantu abagulayo. Abantu babulawa yizifo okungamelanga zibekhona lamhlanje ezinjenge cholera.”

Uthe kusobala ukuthi akulankokheli elizweni leZimbabwe.

“Akulankokheli elizweni. Ilizwe liyintandane, ilizwe kalilabazali.”

UMnangagwa wangena esikhundleni kulandela ukhetho lukamongameli olulempumela eyaphikiswa nguChamisa othi nguye owanqobayo. Umthethwandaba weConstitutional Court wethula isinqumo sokuthi uMnangagwa nguye owanqoba kukhetho lolu.

UChamisa Uthi Akubunjwe Uhulumende Ozaphatha Intambo Okwesikhatshana
please wait

No media source currently available

0:00 0:03:49 0:00

XS
SM
MD
LG