amalinks wokungena

Breaking News

Sebedlana Ingqondo Ngokubunjwa Kwebandla leNew Patriotic Front


FILE - UMnu. Jonathan Moyo ubikwa engomunye wabakubandla leNew Patriotic Front.

Abanye abantu sebezondiswe ludaba lokuphenduka kowayengumongameli, uMnu. Robert Mugabe, okubikwa ukuthi useqoqana lamalunga axotshwa kubandla leZANU PF abe Generation 40 (G40) ukubumba ibandla le New Patriotic Front lona elikhangalelwe ukuncintisa kukhetho lwalonyaka.

UMugabe ubikwa ukuthi uthembe abalandeli bakhe bemaphandleni abavame ukumsekela kukhetho seokhe ilizwe lathola uzibuse.

Kodwa abanye njalo ngabathi yena lamalunga awe G40 agoqela uSkhwicamfundo Jonathan Moyo, uMnu. Savior Kasukuwere lomzukulu wakhe, uMnu. Patrick Zhuwawo, kumele baphume baphele kwezombusazwe.

Kukhanya amalunga alelibandla elitsha, okuthiwa ikhokhelwa nguMnu. Sydney Sekeramayi njalo izaphendukisa uNkosikazi Grace Mugabe, obikwa eseSouth Africa, alungisa ingwalo zokuhlela indlela abazazama ukulwisana loMnangagwa yena owabachithiza okwenza ukuthi abanye babaleke elizweni.

Ingcitshi ecubungula ezombusazwe, uMnu. Pride Mkono, uthe uMongameli Emmerson Mnangagwa kasoze ayethuswe yikuphenduka kuka Mugabe ngoba Usegugile njalo kasenelisi ukuqoqa uzulu ukuthi amvotele kukhetho oluzayo.

Uphinde wathi abantu abanjengo Professor Moyo bayamsebenzisa kodwa yena njengomuntu othanda amandla kakuboni lokhu. Uthe okubonwa nguMugabe yikubuyiselwa esikhundleni akhitshwa kiso engakazimiseli ukutshiya.

Unobhala jikelele wenhlanganiso yabafundi yeZINASU, uMnu. Ashleigh Pfunye, uthe kuzabanzima kuMugabe ukukhipha uMnangagwa esikhundleni ngoba umongameli wahle wabamba ingxenye zonke zikahulumende ezingazama ukusetshenziswa ngabe New Patriotic Party.

Ilunga lenhlanganiso yeTajamuka-Sesijikile Campaign, uMnu. Happiness Ncube, uthe ibandla leli lingenza kubenzima kuMnangagwa njengoba kungabantu abake basebenza bonke abazana izenzo zabo zonke.

Enye ingcitshi yezombusazwe, uMnu. Leopold Munhende, uthe uMugabe engathatha amavoti emaphandleni ngoba wayevele ethandwa ngabahlala khona kodwa okungamhlupha yikuthi abantu abasebenza laye sebesaziwa ngobusela.

Ibandla leNew Patriotic Front likhangelelwe ukuncintisa kukhetho lwalonyaka lapho abanye abathi lizama ukudlisa uMnangagwa ngenxa yalokho abenze khona ngomnyaka ophelileyo.

Nxa uMugabe engamela ibandla leli anqobe kukhetho, uyabe esengezelela phezulu kweminyaka phose engamatshumi amane - 37 ayibusayo.

Ngemva kokususwa kwakhe esikhundleni ngabakubutho ngomnyaka odluleyo, uMugabe, umkakhe, uProfessor Moyo, Kasukuwere labo Zhuwawo abakabonwa emphakathini kodwa bavame ukubonkala enkundleni zokukhulumisana lokuzilibazisa zebulenjini loba ezindabeni lapho uMoyo ake waxoxa lentathelizindaba zomsakazo weBBC.

Facebook Forum

XS
SM
MD
LG