amalinks wokungena

Breaking News

Bayalila eZimbabwe Ngomthetho Obunjwa Nguhulumende Ozavimba Imisebenzi Yenhlanganiso Ezizimeleyo


UMongameli Emmerson Mnangagwa
UMongameli Emmerson Mnangagwa

UMongameli Emmerson Mnangagwa useyamukele inguquko emthethweni osekulolongweni wokulawula ukusebenza kwenhlangangiso ezizimeleyo, owePrivare Voluntary Organisations Bill, ozakupha uhulumende amandla okumisa loba ukuhlawulisa inhlanganiso ezizimeleyo ezibonakala zisebenza ngendlela ephambana lomthetho.

Kodwa inhlanganiso ezizimeleyo zithi akula okuhle ngalumthetho ngoba wephula amalungelo azo. UMlondolozi Ndlovu usethulela loludaba ngokugcweleyo.

Abenhlanganiso ezizimeleyo bahlaba omkhulu umkhosi besola uhulumende ngokuchitha isikhathi ebumba umthetho ongancediyo ngaphandle kokuzihlomisa ukubahlukumeza.

Umphathintambo obona ngokukhitshwa kwemibiko uNkosikazi Monica Mutsvangwa utshele intathelizindaba kuyonale iviki ukuba idale labaphathintambo eleCabinet lisekulolongeni umthetho ozalawula imisebenzi yenhlanganiso ezizimeleyo.

Isikhulumeli senhlanganiso yeCrisis in Zimbabwe Coalition, uMnu. Marvelous Khumalo, uthi umthetho lo uzaphazamisa kakhulu umsebenzi wenhlanganiso ezizimeleyo.

“Siyamangala kakhulu ukuthi uhulumende usefuna iukufaka lumthetho. Umthetho lo bathi uzakwenza kube licala ukuthi senze umsebenzi wezo mbangangazwe. Siyamangala ukuthi ngubani ozabe ekhangela lokhu”

Esinye isakhamuzi seHarare, uMnu Mlungisi Dube, uvumelane loKhumalo esithi kumele uhulumende ahloniphe amalungelo oluntu.

“Kuyadanisa kakhulu ngoba sinanzelela ukuba uhulumende uyabe esephula amalungelo abantu. Kuyindlela yokuba inhlanganiso lezi ezenza okwamalungelo oluntu ziphazamiseke”

Umsekeli wesikhulumeli sebandl leMDC Alliance, uMnu. Felix Magalela Mafa, uthe imizamo kahulumende kayisoze iphumelele ngoba uhulumende kaMugabe wakuzama kwehlula.

“Akusethusi lokhu uhululumende kaMugabe wake wafuna ukufaka umthetho ofanayo. Abantu bawala lumthetho, lanamhla lokhu abantu bazawala lumthetho ngoba uncindezela abantu okumangalisayo.”

Lokhu kugcizelelwe ngowalwa impi yenkululeko, uMnu. Baster Magwizi.

“Siyakwazi sonke ukuthi iZimbabwe ibe ibambeke kakhulu ukuqanda izinto ezinziwa ngabantu abenza imisebenzi yentuthuko lokhu kuzaphazamisa uzulu ngoba inhlanganiso lezi zisenza umsebenzi omkhulu.”

Imizamo yokuthola imibono kahulumende ngaloludaba yehlule.

Uhulumende weZimbabwe uhlala esola amazwe angentshonalanga afana leleMelika ukuba basekela inhlanganiso ezizimeleyo ngenhloso yokuzisebenzisa ukumkhipha embusweni.

UNkosikazi Mutsvangwa uveze ukuba inguquko ezaba khona emthethweni lowo, izakwenza ukuba inhlanganiso lezi zazise uhulumende umsebenzi wazo ngezikhathi zonke.

Loba nje inengi lisazi ukuba uhulumende ubeka imithetho enje emizameni yokuphazamisa inhlanganiso ezizimeleyo, yena uqina ngelokuthi inhloso yakhe ngeyokuvikela ukulondolozwa kwemali emabhanga lokuthi ingasetshenziswa ukuhlawulela imisebenzi yabahlamuki abalwisana laye ama terrorist.

XS
SM
MD
LG