amalinks wokungena

Breaking News

Sebephanyeke Amaphepha Edale leNomination Court Abafuna Ukuvotelwa Nguzulu Kukhetho Lwama By-election ePumula leNkulumane


FILE: Abanye abantu akade besedale leNomination Court koBulawayo ngoLwesithathu. (VOA)

Idale leNominations Court lihlale ngoLwesihlanu eTredgold Magistrates Court koBulawayo lisamukela amaphepha abafisa ukuncitisa kukhetho lwama by-elections azakwenziwa ngoMbimbitho lonyaka.

Belithatha amaphepha alabo abazancintisa kukhetho lokudinga ozamela iNkulumane lePumula edale lephalamende. Izikhundla lezi zadalwa yikuxotshiswa wamalunga ebandla lePeople’s Democratic Party (PDP) libandla leMDC-T elikhokhelwa nguMnu. Douglas Mwonzora.

Izikhundla lezi ngezinye zeziyisithupha zababe ngabebandla lePDP elalikhokhelwa nguMnu. Tendai Biti ezike zanqunywa ngaphambilini ngumthethwandaba oweHigh Court ukuthi kaziyi kukhetho lwama by-elections lolu.

Kodwa kuphinde kwaphuma esinye isinqumo somthethwandaba ofanayo uphikisa isinqumo sakuqala, esiyiso esikhokhelele ukuba ababona ngezokhetho abe Zimbabwe Electoral Commission (ZEC) bacine behlalisa njalo elinye idale leNominations Court.

UNkosikazi Sichelesile Mahlangu, omele ibandla elikhokhelwa nguMnu. Nelson Chamisa, ngomunye wabathi benelise ukuphanyeka amaphepha edale leNomination Court ukuze ancintise kulolu khetho.

“Lamhlanje ngenelise ukuphanyeka amaphepha ami edale leNomination Court ngimele iPumula ngaphansi kwebandla leCCC silinde umhlaka 26 March. Okwenziwe yiHigh Court kuyethusa ngoba yenze isinqumo iphinde ivuke isiguqule. Asazi ukuthi abakwenzayo kuzabafikisa ngaphi.”

Owayelilunga leNkulumane waxotshwa edale lephalamende, uMnu. Kucaca Ivumile Phulu, ngomunye njalo wabenelise ukuphanyeka amaphepha kuleli dale.

“Namuhla sizofayila amaphepha eNomination Court egazethwe ebusuku abantu belele kuyasijabulisa ngoba sizanqoba singene ephalamende siyiCCC sigqoke eziyiyellow njalo kulithuba elihle kakhulu.”

UMnu. Kwanele Hlabangani, umkhokheli welinye lamabandla aphikisayo eleRepublican Party of Zimbabwe, uthi siqondile isinqumo sokuhlala kweNominations Court.

“Namuhla kule Nomination yePumula leNkulumale eyamiswa yisinqumo senkantolo silamalunga azamela ibandla ePumula uStanford Nyoni kuthi eNkulumane nguGregory Ncube njalo kuyasijabulisa okwenziwe yinkantolo ngoba kutshengisa ukuba umthetho ukhona njalo bakwenze lokho bekhangela umthetho ukuba kube leNomination Court.”

UMnu. Tigere Dendere, obemele ibandla leUnited Democratic Alliance, eNomination Court uthi bazamelwa ngoMnu. Ntandoyenkosi Ndlovu ePumula loTirivangani Ndarowa eNkulumane.

“Lokhe idale leNomination Court liqalile konke kuhamba kuhle akula bunzima esibhekane labo okwamanje ilunga linye lihlawula amadola angamatshumi amahlanu eMelika-USD$50.”

Ama by-elections la kwakumele aqhutshwe ngomnyaka ka2020 kodwa ngenxa yokuqhamuka kwegciwane leCOVID-19 amiswa ngabe ZEC. Asezaqhutshwake mhlaka 26 Mbimbitho lonyaka njalo kukhethwa amalunga edale lephalamende lamakhansila abaxotshiswa ezikhundleni ngabamabandla abalisa iMDC-T lePDP ngoba basebekubandla leMDC Alliance lona eseliguqule ibizo selizibiza ngokuthi Citizens for Coalition Change.

Facebook Forum

XS
SM
MD
LG