amalinks wokungena

Breaking News

EleZimbabwe Lithi Kalisekeli Ubudlwangudlwangu Obenzakala Emigwaqweni eMelika


Okunye okwenzakala kwele Melika kulandela ukubulaw kuka George Floyd lipholisa elimhlophe.(REUTERS/Jonathan Ernst)
Okunye okwenzakala kwele Melika kulandela ukubulaw kuka George Floyd lipholisa elimhlophe.(REUTERS/Jonathan Ernst)

Ilizwe leZimbabwe lithi kungamanga ukuthi litshotshozela ukutshengisela kwabantu kwele Melika abakhonona ngokubulawa komuntu onsundu, uGeorge Floyd, lipholisa elimhlophe eMinneapolis.

Lokhu kwethulwe nguMnu. Sibusiso Moyo, umphathintambo obona ngokudlelana lamanye amazwe, othi kungamanga aluhlaza tshoko okwethulwe nguMnu. Robert O’Brien, umcebisi kaMongameli Donald Trump obona ngezomvikela, otshele umsakazo weABC ukuthi eleZimbabwe, eleRussia lele China atshotshozela ukutshengisela kwabantu eMelika abacapulwe yikubhubha kuka Floyd.

UMoyo, obizele ewofisini yakhe ummeli wakwele Melika eZimbabwe uMnu. Brian Nichols, uthi ele Zimbabwe kalifisi ngitsho lakancinyane ukuthi lilwisane lele Melika loba ilizwe leli lethesa inkokheli yebandla le Zanu PF izijeziso zenotho lisithi bephula ilungelo loluntu njalo bayehluleka ukuqhuba ukhetho olubalulekileyo.

“Ngimele uhulumende weZimbabwe, ngitshele uAmbassador Nichols ukuthi ngamanga aluhlaza tshoko ukuthi siyakwenza abakucabangelayo ngoba akulasisindo ngitsho lakancane lokhu njengoba sizama ukuvuselela ubudlelwano lelizwe leMelika. EleZimbabwe lilandela iziqondiso zomthetho wokuhlonipha uzibuse wamanye amazwe okusiqa sesibili seUnited Nations Charter.”

UMoyo uthi utshele uNichols ukuthi ilizwe leZimbabwe lifisa ukuba lobudlelwano obuqinileyo lele America.

“Ngimtshele ukuthi sifuna ukuthi sibe lobudlelwano obuhle obulokuthembana lokuhloniphana kungela lizwe elizangenela kokwenzakala kwelinye. Lokhu akuhambelani lokwethulwe nguO’Brien othi sihlokoza abantu ukuthi bavukele uhulumende kwele Melika. Asikucabangi lokhu njalo kasisoze sikusekele noma kanjani ukuthi kube lomvukela. Ngimtshelile ukuthi akulalutho esingaluthola kulokhu okwenzakala emadolobheni kwele Melika okulabantu abatshengisela emigwaqweni bebhidliza izakhiwo njalo abanye beveza inzondo eyesabekayo.”

uMoyo uthi loba kunjalo, iyasolisa indlela okubulewe ngayo uFloyd ofitizelwe ngedolo phansi lipholisa kulandela imibiko ethi ubezama ukuthenga ngemali engaqondanga.

“Siyakusola okwenzakale kumuyi uFloyd. Asifuni udlakela lokumemetheka kwalokhu endaweni ezitshiyeneyo ezigoqela lapho okuvele kuthule kakhulu.”

UNichols laye wethule umbiko wakhe esithi kuyadanisa okwenzakale kumuyi.

Ukubeke sobala ukuthi abantu bakwele Zimbabwe bahlangana lobunzima obumangalisayo nxa befisa ukutshengisela emigwaqweni nxa kuqathaniswa lelizwe leMelika.

Uthi kwele Zimbabwe kusanda kuthunjwa abalandeli bomanyano weMDC Alliance – uNkosazana Joana Mamombe, uNkosazana Netsai Marova loNkosazana Cecilia Chimbiri, abatshengisela eHarare bekhonona ngokuswelakala kokudla ngesikhathi abantu bevalelwe izindlini kusenzelwa kunqabela ukumemetheka komkhuhlane weCoronavirus COVID-19.

“Ngimtshelile ukuthi kumele uhulumende ayekele ukusekela ukuthunjwa kwabantu abatshiyeneyo. Kumele eleZimbabwe lihloniphe ilungelo loluntu … Kuyadanisa ukuthi sokulesikhathi eside kwathunjwa uPatrick Nabananya, uPaul Chizuze lo Itai Dzamara.

“Iziphathamandla zakwele America ezigoqela umongameli lokhokhela amapholisa eMinneapolise umuntu onsundu uMedaria Arradondo sebekubeke sobala ukuthi kuzalandelwa umthetho ekuthoniseni icala leli.”

XS
SM
MD
LG