amalinks wokungena

Breaking News

Uhulumende Uthule Zwi Ngabongi Abakhalala Umsebenzi


FILE - Abongi labongikazi batshengisela eHarare, Nov. 18, 2008.

Sokulensuku ezifika phose amatshumi ayisithupha – 57 – abongi labongikazi bakhalala umsebenzi eZimbabwe lobanje uhulumende engakhulumisani labo.

Abongi laba batshaya phansi ngenduku besithi kababuyeli emsebenzini nxa uhulumende engakhuphulanga iholo labo ngamadola eMelika.

Inhlanganiso yabongi eyeZimbabwe Nurses’ Association yethule umbiko ngoLwesithathu othi uhulumende kazihluphi ngabo selokhu bakhalala umsebenzi.

UMnu. Anthony Majongosi, umgcinisihlalo weZimbabwe Nurses Association esibhedlela seUnited Bulawayo Hospitals, uthi baqhubekela phambili ngokukhalala umsebenzini.

UMnu. Eventhough Siziba, ongunobhala kunhlanganiso yabongi eMpilo, uthi sebephila ngokuthengisa ngenxa yokuthi abaholi.

“Abanengi bethu sesikhitshiwe ku-payroll asisaholi. Lokhu kwenza ukuthi sihawule. Nxa ungatholanga imali akula ngeyinye indlela ukuthi ungakwanisa ukuthi ugade uye emsebenzini, uthenge lokudla. Sesiphila nzima. Siyacela ukuthi uhulumende ahlale phansi azwe izikhalazo zethu ngoba ayisizo zokuzenzisa kodwa kuyizikhalazo okumele zilungiswe.”

Kumaviki amabili adluleyo umsekeli kamongameli, uRetired General Constantino Chiwenga wakhethwa ukuba nguumphathintambo wezempilakahle kanye lokondliwa kwabantwana ngemva kokuba ugatsha lwezempilakahle luqede isikhathi eside lungela bukhokheli.

Lokhe eqale umsebenzi uChiwenga ubengakakhulumisani labongi kodwa eseHippo Valley Estates uChiwenga watshela iphephandaba leHerald ukuthi basakhangelisisa kabanzi ingatsha zempilakahle njalo bazimisela ukwakha ngakho ukhona umehluko ozaba khona kodwa kudingakala ukuthi abantu basebenze ndawonye.

Lokhu sekunikeze abongi ithemba lokuba kuzaba lomahluko kwezempilakahle.

UNkosikazi Sandisiwe Ncube, isakhamuzi sakoBulawayo, uthi umumo esezibhedlela unzima kakhulu.

Abanye abongi sebephila ngokuthengisa impahla etshiyeneyo ngemva kokuba uhulumende emise ukubaholisa ngenxa yokukhalala umsebenzi. Iholo lezisebenzi zikahulumende liqala kumadola eZimbabwe azinkulungwane ezintathu ZWL3,000 kusiya kunkulungwane eziyisithupha ZWL6000.00.

Imali leyi ilingana lamadola eMelika angamatshumi amathathu – US$30. Abongi banikezwa imali yokubaphathisa ingamadola eMelika angamatshumi ayisikhombisa lanhlanu – US$75.

Kasenelisanga ukukhuluma ngodaba lolu leziphathamandla zikahulumende.

Facebook Forum

XS
SM
MD
LG