Ibandla leMovement for Democratic Change selimise isikhulumeli sebandla leli, uMnu. Obert Gutu, umsebenzi okwesikhatshana limethesa umlandu wokuthi wenza kubelokungezwani kuMDC-T.
Umbiko owethulwe libandla leli lamuhla kulandela umhlangano wedale leMDC National Executive leNational Council, uthi udaba luka Gutu luzahlolisiswa ngemfanelo angakaqalisi umsebenzi.
Okwamanje isikhundla sakhe sibanjwe nguNkosazana Thabitha Khumalo obengumsekeli wakhe.
Kusenjalo, ibandla leli lithi uNkosazana Thokozani Khupe, uMnu. Abednico Bhebhe, uMnu. Lovemore Moyo labanye abambalwa abakhanya bephikisana lokuthi uMnu. Nelson Chamisa akhokhele ibandla leli kulandela ukubhubha kuka Morgan Tsvangirai, sebephiwe iviki ukuthi baziveze kubandla leli.
Ibandla le MDC-T lithi lizathatha amanyathelo anzima nxa bengaqhubekela phambili besethula imbiko etshiyeneyo bengakhulumisani lezinye iziphathamandla zebandla leli.
Kusukela ngoLwesine akusavunyelwa ukuthi abathathu laba labannye bethule imbiko ngebandla leMDC-T bengaphiwanga imvumo.
Amadale la aphinda athi uChamisa nguye osebambe isikhundla sikaTsvangirai abasibangisanayo.