amalinks wokungena

Breaking News

UObert Mpofu Uthi Waphiwa Ingxenye Yepulazi Lika Siphosami Malunga Labanye Bakhe


UMnu. Obert Mpofu

UMnu. Obert Mpofu, ophethe isikhundla sobona ngenhlelo ezitshiyeneyo kubandla leZanu PF, uthi wanikwa nguhulumende ingxenye yepulazi leEsidakeni Farm eNyamandlovu elika Mnu. Siphosami Malunga, umntaka muyi uSydney Malunga, olele emathuneni amaqhawe elizwe eNational Heroes Acre.

UMpofu utshele iVOA Studio 7 ngoLwesithathu kusihlwa ukuba wanikwa ingxenye yepulazi leli nguhulumende ngakho-ke ufisa ukulima kulelopulazi elathengwa nguMnu. Malunga, umntaka muyi uSydney Malunga, uMnu. Charles Moyo loMnu. Zephanisa Dhlamini.

UMpofu uthi wamukela akuphiwa nguhulumende ngoba kalapulazi lokulima okutshiyeneyo.

Uthi ngamanga aluhlaza tshoko ukuba usebenzisa uMnu. Dumisani Madzivanyathi, owangena ngenkani epulazini leli eNyamandlovu esabelweni seMatabeleland North, esithi laye waphiwa ingxenye yepulazi leli.

UMadzibanyathi walile ukusuka epulazini leli ngoLwesithathu kulandela ukukhitshwa kwakhe yisithunywa somthethwandaba, owanquma ukuba asuke Esidakeni Farm.

UMpofu uthi kamazi undoda lo njalo kaviki ngaye ngoba ulencwadi ekhomba ukuba wanikwa ingxenye yepulazi leli ngumphathintambo obona ngezomhlabathi lokulima, uMnu. Anxious Jongwe Masuka, ngoNhlangula lonyaka mhlaka 30.

Kasenelisanga ukukhuluma ngodaba lolu loMadzivanyathi loMasuka akade bengaphenduli omakhalekhukhwini.

Eloba enkundleni yokuxhumana, uMalunga uthe uMadzivanyathi usetshenziswa nguMnu. Richard Moyo, umphathintambo wesabelo seMatabeleleland North, uMnu. Gatsha Mazithulela okhokhela olunye uhlangothi lwamapholisa ensitha aweCentral Intelligence Organization, kanye loMpofu.

UMalunga uthi kusobala ukuba ukwala kuka Madzivanyathi ukusuka epulazini leli kuveza ukuthi kulabantu abalezikhundla eziphezulu kuhulumende lakubandla elibusayo abamsebenzisayo.

Kodwa uMpofu uthi, “Ngingakwenzelani lokhu njengoba lami nganikwa incwadi yokwabelwa ipulazi leli. UMalunga labanye bakhe abakwekele lokhu ngoba kuzahlupha lathi singenza lokhu abakwenzayo njalo kuzabakhathaza.”

Kasenelisanga ukukhuluma loMazithulela loMoyo abangaphendulanga omakhalekhukhwini.

UMalunga, uDhlamini loCharles Moyo bathenga ipulazi leli komkhophe owasuka eZimbabwe wayahlala kwele Australia.

Facebook Forum

XS
SM
MD
LG