Abanikazi bepulazi leEsidakeni eNyamandlovu esabelweni seMatabeleland North bathi usomabhizimusi njalo oyisiphathamandla sebandla leZanu PF, uMnu. Obert Mpofu, usengene epulazini leli esithi walinikwa nguhulumende.
UMnu. Siphosami Malunga, umntaka muyi uSydney Malunga, owanikwa isicoco seqhawe lesizwe njalo wangcwatshwa emathuneni eNational Heroes Acre eHarare, uthi izithunywa zika Mpofu sezilima Esidakeni Farm.
UMalunga wathenga ipulazi leli ebambisana losomabhizimusi uMnu. Charles Moyo loMnu. Zephania Dhlamini, osebenza eNational University of Science and Technology.
UDhlamini uthi izisebenzi zika Mpofu sezilima lapho akade bekhangelele ukuthi bazalima khona amahanyanisi.
UMpofu uthi usethatha umhlabathi awunikwe nguhulumende.
UDhlamini uthi banengi abafuna ipulazi leli abalithenga kowayengumnikazi walo.
Izisebenzi ezinengi Esidakeni Farm zilakho ukulahlekelwa ngumsebenzi nxa uMalunga labanye bakhe bengathathelwa ipulazi leli.