Isiphathamandla sebandla leZanu PF, uMnu. Obert Mpofu, ongene ngoLwesihlanu epulazini elathengwa nguMnu. Siphosami Malunga labanye bakhe, uthi kasuki Esidakeni Farm eNyamandlovu ngoba unikwe ingxenye yalo nguhulumende.
UMpofu uthi izisebenzi zakhe sezilima kwenyinye indawo epulazili leli elathengwa ngomnyaka ka2017 nguMalunga, usomabhizimusi uMnu. Charles Moyo loMnu. Zephania Dhlamini, ingcwethi kwezokulima njalo ofundisa eNational University of Science and Technology.
UMalunga ngumntaka muyi uSydney Malunga, owanikwa isicoco seqhawe lelizwe wangcwatshwa emathuneni amaqhawe eNational Heroes Acre eHarare.
UMpofu uthi ulencwadi ayinikwa nguhulumende emvumela ukuba athathe ingxenye yepulazi leli.
Abanikazi bepulazi leli bakhangelelwe ukuba bazaphanyeka udaba lolu emthethwandaba kunsukwana ezilandelayo. Isithunywa somthethwandaba sisanda kuzama ukususa uMnu. Dumisani Madzvivanyathi epulazini leli. UMadzivanyathi wangena Esidakeni Farm esithi laye wanikwa imvumo nguhulumende ukuba athathe ingxenye yalo.
UMnu. Dhlamini uthi banengi abafuna ipulazi leli lapho abalima khona amatamatisi, ihanyanisi lokunye abakuthengisela uzulu.