Ukukhalala umsebenzi okwenziwa ngodokotela bezibhedlela zikahulumende elizweni lonke sokulamaviki amabili njalo abongi labo bathi balakho ukumanyana labo ngoLwesine nxa uhulumende engaqhubeka eqinisa ikhanda engafuni ukulungisisa izikhalazo zabo.
Kulemibiko ethi kwezinye indawo zelizwe abongi bavele sebekhalalala umsebenzi.
Odokotela esibhedlela seUnited Bulawayo Hospitals batshengisele ngoLwesithathu besithi izikhalazo zabo azinanzwa nguhulumende.
Okunye abakhala ngakho yikusebenza ezibhedlela ezingela mithi eyenelayo kanye leholo eliyingcosana.
Omunye walabo abakade betshengisela uDokotela Mxolisi Ngwenya, isikhulumi senhlanganiso yabodokotela laba eye Zimbabwe Hospitals Doctors Association (ZHDA) njalo ongumsekeli womkhokheli wayo, uthi umphathintambo wezemplakahle uDokotela David Parirenyatwa uyehluleka ukugcina izithembiso zikahulumende.
UDokotela Ngwenya wengeze esithi sebeke baxoxisana lohulumende bananzelela ukuthi akabaqakathekisi ngakho-ke ababuyeli emsebenzini nxa izikhalazo zabo zingananzwanga.
Uthe njalo odokotela abakhulu kumele bekele ukuqamba amanga ngokuthi umumo wezibhedlela ulungile.
Udokotela omkhulu esibhedlela seMpilo, uDokotela Solwayo Ngwenya, uthi uhulumende lokhe ephakathi kokuxoxisana labodokotela lobanje kungakavunyelwana lutho.
Nguye othi umumo esibhedlela ukahle njalo abakalahlekelwa yimphefumulo yabantu. Uthi abahlaselwe luhlupho lolu kakhulu ngabantu abazodinga ukwelatshwa bevela phandle ababizwa ngokuthi ngama Outpatients.
Ebuzwa ngokukhalala umsebenzi kwabongi labomongikazi, uNgwenya uthi lokhu usekuzwile kodwa bengakaziswa ngakho.
Ukhuthaze ukuthi bengakhalali umsebenzi bakhulumisane lohulumende kwenqatshelwe ukufa kwabantu.
Abongi benze umhlangano wabo ngoLwesithathu emini lapho abakade bezavumelana khona izikhalazo abazazisa kuhulumende.
Abakade betshengisela laba bebephethe amaphepha abhalwe ukuthi umqondisi wesibhedlela uhamba ngemota yohlobo lweJeep isibhedlela singela ithonsi le drip.
Indawo ebizwa ngokuthi yiOutpatients Ward eMpilo ibitshaya umoya ingela muntu osebenzela khona ngitsho labongi.
Odokotela abananza izigulane ngodokotela abakhulu abangavunyelwa ukukhalala umsebenzi kodwa abenelisi ukuthi banakekele wonke umuntu ogulayo.
