Uhulumende weZimbabwe uthi kulamabhasi angamatshumi amathathu eHarare azathwala abantu abafisa ukuya esililweni sikamuyi uOliver Mtukudzi obhubhe ngoLwesithathu.
UNkosikazi Monica Mutsvangwa, umphathintambo kahulumende obona ngokwethulwa kwemibiko, uthi kuzabe kulamabhasi njalo ezabelweni ezitshiyeneyo azathwala abantu abafuna ukuya esiqintini seMadziwa esabelweni seMashonaland Central lapho uMtukudzi azangcwatshwa khona ngeSonto.
UNkosikazi Mutsvangwa uthi kusukela ngoLwesihlanu kusiya ngeSonto uhulumende uzancedisa umdeni kamuyi ngokutshiyeneyo.
Isidumbu sikaMutukudzi sithwalelwe endlini yakhe eNorton ngiMgqibelo lapho okuzakwenziwa khona inkonzo ngoMggibelo engakathwalelwa eNational Sports Stadium okuzabe kulabaculi abambalwa.
Kusuka lapho isidumbu sakhe sizathwalelwa enkambeni yamasotsha eyeOne Commando eHarare. Emini yantambama, sizathwalwa ngendizamtshina yohlobo lwama helicopters ezizasitshiya emzini wakhe emaphandleni eMadziva.
Umuyi uphiwe isicoco seqhawe lesizwe ese-national hero. Abantu abanengi bayakuncoma lokhu besithi bekungamangalisa uzulu nga uhulumende kamnikanga isicoco lesi.
Omunye wabancoma lokhu nguMnu. Denzel Dube, umqondisi weqembu labaculi eleNdolwane Super Sounds, othi uMtukudzi ubengumculi othanda uzulu.
