Umpolofitha olodumo, uTapiwa Freddy, owetheswa icala lokudlwengula umfelokazi ogogekileyo umiswe emthethwandaba ngoLwesine wavunyelwa ukuhlawula isibambiso sebail.
UFreddy wetheswa icala lokudlwengulwa umfelokazi lo kulenyanga ezintathu kwabhubha umkakhe.
Umsakazo weZimbabwe Broadcasting Corporation ubika ukuba uFreddy wethekelela umfelokazi lo emzini wakhe esithi ufisa ukumkhulekala.
Wathi efika endlini yakhe wahle waphosa amazwi othando kodwa wakha phansi.
Kubikwa ukuba uFreddy wamdlwengula wamthembisa ukuba uzamgcina labantwana bakhe.
Umthethwandaba utshelwe ukuba uFreddy wathi eqeda kumdlwengula wathi “usungumfazi wami.”
Wabuyela endlini yomfelokazi okwensuku ezimbalwa wamdlwengula lobanje umfelokazi wamtshela ukuba isiko lakhe kalivumi ukuba angene emacansini lendoda kungekedluli umnyaka.
Esebona ukuba uFreddy uqhubekela phambili emtshaphaza, owesifazana la wabikela umalumakhe ukuba uthwele nzima ngendoda yomnikazi ekhokhela inhlanganiso ye Goodness and Mercy Ministries.
UFreddy esizwa lokhu umthethwandaba utshelwe ukuba wamtshaya ngempama ngolunye usuku wamtshiya ematasatasa.
Umalumakhe wabikela izihlobo ngokwenzakalayo amapholisa acina engenela kudaba lolu.
Amacala anje akujayelanga ukuba owetheswa icala elinje aphiwe isibambiso sebail.
UFreddy ukhangelelwe ukuba uzamiswa njalo emthethethwandaba mhlaka 6 kuLwezi.