amalinks wokungena

UPatrick Chinamasa Wethula Ibudget ka2018 Emumethe Ezokuthuthukisa Umnotho weZimbabwe

  • Mavis Gama

UMnumzana Patrick Chinamasa umpathintambo wezemali.

Umphathintambo wogatsha lwezemali uMnu. Patrick Chinamasa ngoLwesine wethula uluhlu lwendleko kahulumnde, ibudget yomnyaka ozayo, olungamadola angama billion amahlanu, $5,1 billion.

UChinamasa uthe uzimisele ukulandela ezinye iziqondiso zokwehlisa indleko okubaliasa ukuguqula umthetho wezokuqhuba ibhizimusi, owe indiginisation, kanye lokwehlisa inhambo zeziphathamandla zelizwe zokuya kwamanye amazwe.

Uthe njalo abasebenza kuhulumende asebedlule iminyaka engamatshumi ayisithupha lanhlanu kuzamele bayephumula.

Kumizamo yokuvuselela ukuthembeka kwelizwe kwezomnotho, uChinamasa uthe umbuso kaMongameli Emmerson Mnangagwa uzaqhuba inhlelo ezimbalwa okufana lomthetho wezokunikeza amandla kumankampani kuzizalwane zakuleli, we indigenisation obusiba ngumgoqo kulabo abafisa ukuzasungula amabhizimusi abo kuleli.

UChinamasa uthe umthetho we indigenization usuzasebenza kuphela kwabemba amatshe aligugu abalisa amadayimama le platinum kuphela.

UChinamasa uthe kuzamele uhulumende aguqule umthetho olawula ngezomhlabathi, azihloniphe zonke izivumelwano ezenziwa labakwamanye amazwe, ezama Bilateral Investment Promotion and Protection Agreement (Bippa) ngeSilungu, abuyiselwe lawo mapulazi ayabe ahluthunwa engaphansi kwezivumelwano.

Phezu kwakho konke, uChinamasa uthe kuzamele bamiswe umsebenzi abatsha abekade beqhatshwe, ama Youth Officers afika phose inkulungwane ezine kanye lokwehlisa imali esetshenziswa kunhambo zamalunga kahulumende obekungumlandu obusetheswa obengumongameli osewatshiya umsebenzi, uMnu. Robert Mugabe.

Okunye uChinamasa uthe kuzokwenziwa ukuthuthukisa umnotho welizwe, yikulungisisa kwezokuthathwa kwemali yemithelo okubalisa emingceleni lapho kungena khona impahla labantu.

Kungalesi sizatho-ke esithi kuzosiwa abakubutho ukuyaqhuba umsebenzi emgceleni wase Beitbridge ukwenza lumsebenzi phansi kohlelo lokulungisisa isimo lwe ‘Operation Restore Order’.

UChinamasa uthi enye indlela yokuvuselela umnotho kuzokuba yikulwisana lokungathembeki icorruption, kuzosungulwa indlela yokukhulumisana ngencingo ezizongena emahofisini kamongameli ama Toll Free Lines ukuze uzulu abike okunga kusenziwa yilabo abaqhuba imisebenzi yokungathembeki.

UChinamasa uthi uhulumende uzokwehlisa njalo inani lamahofisi abammeli belizwe kwamanye amazwe ukwehlisa indleko zikahulumende.

Phezu kwakho konke uChinamasa uthi uhulumende kamongameli Mnangagwa ukubone kumqoka ukuvuselela inxoxo labakwamanye amazwe, kuvuselelwe ezokuqhuba imisebenzi yokuthengiselana.

Facebook Forum

XS
SM
MD
LG