UDokotela Peter Magombeyi, obedingwa kulandela imibiko ethi uthunjiwe ngabacatshangelwa ukuthi badlelana lohulumende kaMongameli Emmerson Mnangagwa, usevumbuluke eNyabira duzane leHarare.
UDokotela Magombeyi utshele umsakazo weStudio 7 ukuthi kasakhumbuli ukuthi ufike njani kuleyondawo njalo lokuthi kwenzakalani kusukela ngoMgqibelo kuze kube ngoLwesine.
UDokotela Magombeyi, ozwakale ehlulukelwe emsakazweni, uthe akukhumbula kancane yisikhathi engena kweyinye indawo evaliweyo lapho atshiswa khona ngomlilo kagetsi.
“Ngiqinisile ukuthi yimi uDokotela Magombeyi. Ngisebenza eHarare Hospital … Ngikhumbula kancane ngisendaweni evalekileyo eyi-basement lapho engatshiswa khona ngomlilo kagetsi. Okunye kangikukhumbuli kahle. Kuzangithatha isikhathi ukuthi ngicabange kahle.”
NgoLwesine ntambama ubesesenkambeni yamapholisa eHarare Central Police Station.
Amagqwetha akhe ayelelwe ukukhuluma laye kwathi isikhulumeli samapholisa uAssistant Commissioner Paul Nyathi walile ukukhuluma ngodaba lolu.
UNyathi uthe, "Sizakwethula umlayezelo ngesikhatshana ngodaba lolu."
Odokotela sebelesikhathi bakhalala umsebenzi besithi bafuna ukuthi uhulumende akhuphule iholo labo. Udokotela uhola amatshumi amane amadola ngenyanga.