Abathengisa amafutha ezimota ngudlu bathi uyaqhela umkambo wokuthengisa ipethulo lamanye amafutha ensitha lobanje kusobala ukuthi indwendwe lokhe ziqhela emagalajini emadolobheni lemaphandleni lapho okumele kutholakale khona amafutha la.
Abawathengisa ensitha bathi batshaya imali enengi kulezi insuku.
UMnu. Emeritus Chagurwa uncome abathengisa lawa amafutha epethulo ngudlu esithi bayaphathisa ikakhulu nxa umuntu esephelelwe njalo ejahile.
Kodwa-ke uMnu. Sipho Sibanda uthi udubo lwamafutha luzaba nzima ukuluqeda njengoba solubangwa ngamandla ngabantu asebefuna ukuthola inzuzo ephezulu ngokuthenga bethengisele abanye.
Uthi kuqathekile ukuthi kube lomthetho obopha abatholakale bethengisa ipethulo ngudlu.
“IFuel udubo lwayo kuzaba nzima ukuthi iphele ngoba lathi abantu yithi esikubangelayo lokhu. Ungakhangela uzabona imota ezifananayo zilindele ipethulo. Isilinganiso sokungamalitha amahlanu awepethulo sibiza abadola ayisikhombisa kodwa ipethulo ethengiswa ngudlu ibiza amadola angamatshumi lambili ilitha linye ngalinye. Umuntu nxa ele 200 liters uyabe eyense imali enengi kakhulu.”
Abanye abakhulume leStudio 7 kodwa bala ukuthi bakhulume amagama abo bekhuluma emoyeni bathi bona amafutha lawa athengiswa ngudlu emagalajini nxa abantu sebelele njalo akulamuntu ongakubona kusenzakala kumbe akumise.
Bathi lababantu basebenza ndawonye labamagalaji babe sebesiyawathengisa amafutha la ngudlu ngoba ngaleyo ndlela bethola inzuzo ephezulu kakhulu.
