amalinks wokungena

Breaking News

Amapholisa Athi uJacob Ngarivhume loHopewell Chin'ono Babotshelwe Ukuphehla Umvukela eZimbabwe


FILE: UMnu. Hopewell Chino'ono uxoxa labanye bakhe eHarare, Oct. 10, 2018.

Amapholisa athi uMnu. Jacob Ngarivhume, okhokhela umkhankaso wokutshengisela obizwa ngokuthi yi3st July Movement, kanye loMnu. Hopewell Chin’ono, intathelizindaba ezimeleyo, babotshelwe ukuthi baphehla umvukela eZimbabwe.

Isikhulumeli samapholisa uSenior Assistant Commissioner, Paul Nyathi, wethule umbiko ngoMvulo othi ababili laba bacatshangelwa ukuthi bephule iziqa zomthetho owesatshwa ngabantu obizwa ngokuthi yi Criminal Law (Codification and Reform) Act.

Umthetho lo ukubeka sobala ukuba umuntu ulakho ukubotshwa nxa ekhuthaza abantu ukuthi batshengisele emigwaqweni kumbe ngezinye indlela ezeyisa uhulumende welizwe leZimbabwe.

Inhlanganiso yamagqwetha amele uChin’ono ithi ucatshangelwa ukuba wethula imibiko embalwa ekhuthaza abantu ukuthi batshengisele emigwaqweni ekupheleni kuka Ntulikazi bekhonona ngobukhohlakali obenziwa ngezinye iziphathamandla zikahulumende.

UMnangagwa usanda kuxotsha kuhulumende uDokotela Obadiah Moyo, owayengumphathintambo obona ngezempilakahle, esithi kukhanya engani wayengomunye wabaphatheka ekuthengeni impahla yokuvikela uzulu kumkhuhlane weCoronavirus kusetshenziswa inkampani yeDrax International, kungalandelwanga imithetho yelizwe.

Kuthiwa uChin’ono, omelwe ngamagqwetha abalisa uNkosikazi Beatrice Mtetwa, uMnu. Gift Mtisi loMnu. Douglas Coltart abakunhlanganiso yeZimbabwe Lawyers for Human Rights (ZLHR), ubekhuthaza ukuba uhulumende kaMnangagwa asuswe embusweni ngedlela ezitshiyeneyo.

UNgarivhume laye wetheswa icala lokuthi usekhulume kanenginengi ngokuthi abantu kumele batshengisele ekupheleni kuka Ntulikazi besola obukhohlakali benkokheli yelizwe njalo lombuso ochuku kaMnangagwa labanye bakhe abakubandla leZanu PF.

Unobhala omkhulu obona ngokwethulwa kwemibiko, uMnu. Nick Mangwana, wethule umbiko ebulenjini bokuxhumana obeTwitter esithi wonke umuntu eZimbabwe, okugoqela intathelizindaba, odokotela, abongi labanye kumele balandele imithetho yelizwe.

Ukubotshwa kwababili laba sokuchothozwe nguhulumende wakwele Melika lamanye amazwe.

Facebook Forum

XS
SM
MD
LG