UMongameli Emmerson Mnangagwa usexotshe umsebenzi uNkosikazi Prisca Mupfumira, umphathintambo obona ngezisebenzi owabotshwa yikhomishini yeZimbabwe Anti-Corruption Commission ngeviki ephelileyo.
UMnangagwa uthi umxotshele ukuthi wenze okungahambelani lewofisi yomuntu ongumphathintambo kahulumende.
Incwadi elotshelwe uNkosikazi Mupfumira nguMnu. Misheck Sibanda, usibalukhulu obona ngokwenzakala emawofisini yabaphathintambo bakahulumende leka mongameli, iveza ukuthi uMnangagwa usebenzise iziqondiso zesisekelo sombuso welizwe ekuxotsheni uNkosikazi Mupfumira.
Okwamanje uNkosikazi Mupfumira uvalelwe entilongweni yeChikurubi Remand Prison duzane leHarare.
Wetheswa amacala ambalwa agoqela elokuthi unakanelwa ukuthi wathatha imali efika phose izigidi ezilikhulu zamadola - $95 million – kunkampani yeNational Social Security Authority wayifaka kwelinye ibhanga lapho okuthiwa wayigegelela ngasese wayisebenzisa santando.
Okuthiwa wakwenza kuphakathi kogwalo lweNational Social Security Authority oluveza ubukhohlakali kunkampani le. Amabandla aphikisayo athi afuna ugwalo lolu lwethulelwe uzulu.