amalinks wokungena

Breaking News

Bayakhala eZimbabwe Ngomthetho Obunjwayo Olakho Ukubhidliza Inhlanganiso Ezinengi Ezizimeleyo


FILE: Zingavalwa inhlanganiso ezikhangelane labantu asebekhulule lezinye kungabunjwa iziqondiso ezintsha zomthetho wePrivate Voluntary Organizations Act.

Inkokheli yenhlanganiso ezinengi ezizimeleyo ikhonona ngokwenziwa nguhulumende kaMongameli Emmerson Mnangagwa, osefuna ukuqinisa iziqondiso zomthetho okhangelane lokusebenza kwenhlanganiso lezi ezilakho ukubhidlika nxa kungaguqulwa umthetho wePrivate Voluntary Organizations Act.

Idale lephalamende likhangelelwe ukuba lizahlafuna iziqondiso ezintsha zokuqinisa umthetho lo, okukhangelelwe ukuba kuzaphumelela ngoba ibandla leZanu PF lilamalunga amanengi edale leHouse of Assembly leleSenate. Iziqondiso zomthetho lo ezibunjwayo zizakwenza kube lomabhalane ozahlawulisa zonke inhlanganiso ezizimeleyo imali yokuba zisebenze njalo ebelamandla okuxotsha bonke abasebenzelana lamabandla ezombusazwe.

Abatholakala besephula umthetho bazahlawuliswa imali enengi kakhulu kumbe bevalelwe umnyaka wonke entilongweni. Abatholakala besebenza okungekho emthethweni bazavalelwa entilongweni okweminyaka elitshumi. Inkokheli zenhlanganiso ezizimeleyo zithi lokhu kufana lokuvala zonke inhlanganiso ezilwela ilungelo loluntu lokunye.

UMnu. Gerald Matiba, okunhlanganiso yeChristian Legal Society of Zimbabwe, uthi umthetho obunjwayo ulakho ukwephula isisekelo sombuso welizwe.

UMatiba uthi kunengi okungacaciyo kulokhu okwenziwa nguhulumende.

Omunye okhonona ngokwenziwa nguhulumende nguMfundisi Useni Sibanda, umqondisi weZimbabwe Christian Council.

USibanda uthi kumele njalo kuvezwe injongo kahulumende.

Kodwa uMnu. Elifasi Mashaba, okubandla leZanu PF, uthi uhulumende wenza kahle.

UMnu. Tafadwa Muguti, obona ngezentuthuko eHarare Metropolitan, usanda kwehluleka ukubamba ngamandla inhlanganiso ezizimeleyo ukuba zisebenze ziphansi kwewofisi yakhe. Umthethwandaba wathi akukho emthethweni okwenziwa nguMuguti, owakhethwa libandla elibusayo.

Facebook Forum

XS
SM
MD
LG