amalinks wokungena

Breaking News

Mangwana: Abafuna Ukutshengisela Emigwaqweni Bazama Ukugenqula Uhulumende kaMnangagwa


FILE: UMongameli Emmerson Mnangagwa wangena esikhundleni sikamongameli ngomnyaka ka2017 encedisana lebutho. (AP Photo/Ben Curtis)

Uhulumende weZimbabwe uzonde ugan'unwabu ngokutshengisela okuzakwenziwa ngabantu emigwaqweni ekupheleni kuka Ntulikazi.

Uthi abafuna ukwenza lokhu ngabazama ukususa embusweni ngenkani uMongameli Emmerson Mnangagwa lebandla lakhe eleZanu PF.

Abafisa ukutshengisela bathi sebekhathele yikubuswa libandla leli elehluleka ukulungisa umnotho ogugudeka okumangalisayo lokwephulwa mahlayana kwelungelo likazulu.

UMnu. Nick Mangwana, umabhalani omkhulu kuhlangothi lukahulumende olubona ngokwethulwa kwemibiko, uthi abantu abafuna ukutshengisela bazama ukususa uMnangagwa esikhundleni okungekho emthethweni.

UMangwana ulobe ebulenjini bokuxhumana obeTwitter esithi kusobala ukuba abafisa ukwenza lokhu bancediswa ngamazwe entshonalanga.

Ulobe esithi, “Kuyazikhanyela ukuthi abantu laba bahlose ukususa uhulumende embusweni. Akuhambelani lokungethembeki lokhu abakhuluma ngakho. Bazama ukuhluthuna umbuso bawunike abangakhethwanga nguzulu.”

Okunye akwethule enkundleni le kuveze ukuba uhulumende ukhathazekile ngokutshengisela okuzakwenziwa ngabantu ilizwe lizama ukuvimba ukumemetheka komkhuhlane weCOVID-19.

“Akulamuntu obengakhathazwa yikutshengisela kwabantu kungelamkhuhlane weCOVID-19. Esikubonayo yikuthi bazama ukususa uhulumende okungekho emthethweni bawunike abantu makhaza. Lokhu yikwephula umthetho. Uhulumende kazulu kasebenzi njalo. Okwamanje kumele silwisane lomkhuhlane we#Covid19Zim.”

Okwamanje kulabantu abedlula inkulungwane - 1,089 abalomkhuhlane lo eZimbabwe. Kulabantu abafika phose amakhulu amane – 395 abaphepha kuCOVID-19 uthi njalo abangamatshumi amabili babhubha.

UMangwana uthi kukhanya engani ukutshengisela lokhu kubaselwa ngamanye amazwe angelandaba lokumemetheka komkhuhlane weCOVID-19 eZimbabwe.

“Kuyamangalisa okwenziwa ngabaphikisayo abamanyana labantu bakwamanye amazwe abafisa ukwenza konke lokhu bengelandaba lokumemetheka komkhuhlane lo obulala abantu. Bazama ukususa uhulumende embusweni okungekho emthethweni. Benza lokhu bekwazi mhlophe ukuthi abantu balakho ukuthapha igciwane leCOVID-19.

“UMongameli ED Mnangagwa ufisa ukuthi kubelenguquko eZimbabwe kodwa hatshi le abayenzayo. Asifuqwa thina ukuthi kube lenguquko. Inguquko eyenkani kayisebenzi. Kumele kube lenguquko kazulu hatshi eyabanye abantu abafuna ukusibamba ngamandla. Hatshi bo!!”

Iphephandaba leChronicle, elidlelana lohulumende, lisekela imibono kaMangwana lisithi “kusobala ukuthi abantu laba bafuna ukususa uhulumende okungekho emthethweni bebambisana lamazwe entshonalanga … Ukutshengisela lokhu akuyindawo njengalokhu okwake kwenziwa eZimbabwe.”

Kodwa-ke amabandla aphikisayo anjenge leMDC Alliance, elikhokhelwa nguMnu. Nelson Chamisa, lelika Mnu. Jacob Ngarivhume eleTransform Zimbabwe, athi uzulu ulelungelo lokutshengisela emigwaqweni, ngakho-ke kumele uhulumende abavumele ukuba benze lokhu okumunyethwe yisisekelo sombuso welizwe.

Kulamanye njalo amabandla agoqela eleMthwakazi Republic Party, elikhokhelwa nguMnu. Mqondisi Moyo, kanye lele MDC-T elikhokhelwa nguNkosazana Thokozani Khupe, athi kawasoze aphatheke ekutshengiseleni lokhu okulesihloko esithi #ZanuPFMustGo.

Facebook Forum

XS
SM
MD
LG