amalinks wokungena

Breaking News

Amapholisa Avimba Ngomthetho wePublic Order Ukutshengisela Emigwaqweni Kwamalunga Ebandla leMDC


FILE: Zimbabwe riots

Amapholisa kwele Zimbabwe athi asevimbe okusemthethweni ukutshengisela obekumele kwenziwe namuhla eHarare ngamalunga ebandla leMovement for Democratic Change elikhokhelwa nguMnu. Nelson Chamisa.

Iphephandaba leHerald libika ukuthi lokhu kwethulwe yisikhulumeli samapholisa, uAssistant Commissioner Paul Nyathi, onike uMnu. Amos Chibaya isinqumo lesi izolo kusihlwa.

UNyathi uthe isinqumo lesi sitsho ukuthi abantu abazatshengisela bazabe besethula umthetho. Kusetshenziswe esinye isiqa somthetho wePublic Order and Security Act ukuthi kuvinjwe ukutshengisela kwamalunga ebandla leMDC lanye abantu abakhonona ngesimo esibi somnotho eZimbabwe.

UNyathi uthi amapholisa akhangelelwe ukuthi azakuba manengi eHarare lapho abazabe bemisa abantu bebahlolisisa ukuthi bajongeni.

Kodwa-ke ibandla leMDC lithi kaliwuzwanga umbiko lo owethulwe ngamapholisa. UMnu. Chalton Hwende, unobhala jikelele webandla leli, uthi kabazihluphi ngalokhu okwethulwe nguNyathi.

Isikhulumeli sebendla leMDC, uMnu. Daniel Molokele, uthi bazaqhubekela phambili ngokutshengisela emigwaqweni.

UMolokele uthi kunengi okuhlupha abantu eZimbabwe asebebona ukuthi kungcono bangene emigwaqweni beveze abakugcine ezifubeni zabo.

Uphinde wathi nxa besuke eHarare bazakuya kwamanye amadolobho lapho uzulu azatshengisela ekhonona ngesimo esibi somnotho.

Kodwa-ke, uMnu. Obert Mpofu, unobhala webandla leZanu PF obona ngenhlelo ezitshiyeneyo, uthi akusizi lutho ukutshengisela emigwaqweni.

Uhulumende owayekhokhelwa ngowayengumongameli, uMnu. Robert Mugabe, laye wavimba amalunga ebandla leMDC ukuthi atshengisele eHarare lapho uzulu ayekhala ngokungaguqulwa indlela okwenziwa ngayo ukhetho lokunye okumbalwa.

Udaba Esilethulelwe NguGibbs Dube
please wait

No media source currently available

0:00 0:05:12 0:00

Umsakazo weStudio 7 uphinde waxoxa labantu abambalwa ngokutshengisela emigwaqweni okufunwa libandla leMDC elikhokhelwa nguMnu. Nelson Chamisa. UMnu. Paul Ndlovu uthi uyakusekela. Omunye njalo okusekelayo nguMnu. Adolf Shava.

Abantu abanjengo Mnu. Hloniphani Ndlovu bathi ukutshengisela emigwaqweni yikho okuzakwenza uhulumende kaMnangagwa alalele uzulu.

Kodwa uMnu. Stanely Ncube uthi okuzakwenziwa libandla leMDC akusoze kuguqule lutho eZimbabwe.

Akwaziwa ukuthi kuzakwenzakalani emigwaqweni eHarare namuhla. Abadala bathi sizayicela izivuthiwe.

Okwethulwe Ngabalandeli Bomsakazo weStudio 7 ...
please wait

No media source currently available

0:00 0:02:52 0:00

Facebook Forum

XS
SM
MD
LG