amalinks wokungena

Breaking News

'Abantu Kumele Batshengisele Emigwaqweni Ekupheleni Kuka Ntulikazi Loba Besesaba Ibutho'


FILE: Amasotsha atshaya abantu abatshengisela emigwaqweni eZimbabwe, Harare, Zimbabwe, Aug. 1, 2018.

Banengi abantu abathi bazatshengisela labanye emigwaqweni ekupheleni kuka Ntulikazi bekhonona ngokugugudeka komnotho welizwe leZimbabwe kanye lombuso webandla leZanu PF abathi uncindezela ilungelo likazulu.

Bathi wenze kahle uMnu. Jacob Ngarivhume webandla leTransform Zimbabwe, inhlanganiso ezizimele zodwa labantu nje jikelele, abathi ukutshengisela lokhu kumele kuguqule indlela okwenziwa ngayo kwezomnotho lezombusazwe.

Kodwa-ke abanye babo bathi besaba ibutho elilakho ukudubula abatshengisela emigwaqweni njengalokhu okwenziwa ngomnyaka ka2018 lanyakenye abantu baze bengene emigwaqweni bekhonona ngokutshiyeneyo.

Abakubandla leZanu PF bathi akumelanga abantu batshengisele emigwaqweni ngoba kulabanye abangantshontsha impahla ezitolo, babhidlize lezakhiwo.

Ukutshengisela okuzakwenziwa ekupheleni kuka Ntulikazi kwenziwa ngaphansi kwesihloko esithi #ZanuPFMustGo.

Ukuze sihlaziye udaba lolu sixoxe loMnu. Josphat Mzaca Ngulube, olwela ilungelo likazulu, uNkosazana Nokuthula Adonsi, ozimeleyo, loMnu. Joseph Golide Tshuma, okudale leZanu PF Central Committee.

UNgulube uthi abantu bonke kumele batshengisele ngokuthula bangasuki emigwaqweni kuze kulungiswe konke okuhluphayo.

Lokhu kusekelwe nguNkosazana Adonsi othi ukutshengisela lokhu kumele kwenziwe ngoba abantu bayahlupheka kakhulu.

“Abantu bafuna ukuhambisa izikhalazo zabo. Sithi sesikhathele. Asambeni sonke sitshengisele emigwaqweni.”

Facebook Forum

XS
SM
MD
LG