amalinks wokungena

Breaking News

Sokuthoniswa Icala Eletheswa uTrump Edale leSenate eMelika


Trump Impeachment
Trump Impeachment

Idale leSenate kwele Melika seliqalile ukuthonisa icala eletheswa uMongameli Donald Trump ngesikhathi kungakhanyi kahle ukuthi kuzabizwa abafakazi kumbe hatshi abafunwa libandla lama Democrats elithi kunengi okufihlwa nguTrump, ovimba abanye bakhe ukuthi bethule ubufakazi obungenza ukuthi asuswe esikhundleni.

UMnu. Mitch McConnell, umkhokheli wedale leSenate okubandla lama Republicans, uthi kumele abatshutshisi abamele ibandla lama Democrats banikwe ilanga lonke lokuchaya icala abalethesa uTrump njalo labamele umongameli bamvikele okwesikhathi esifanayo.

Abakubandla lama Democrats bafuna ukuthi kubizwe abafakazi abanjengo Mnu. John Bolton, owayebona ngezomvikela kuhulumende kaTrump loMnu. Mick Mulvaney, umqondisi wenhlelo ezitshiyeneyo ewofisini kaTrump, abathi balwazi mhlophe udaba lolu ngoba bazama ukuvimba uTrump ukuthi amise uncedo lwezikhali okwakumele zinikwe ilizwe leUkrainne. UTrump kubikwa ukuthi wayefuna ukuthi uMongameli Volodymyr Zelenskiy wakwele Ukrainne avule icala lokuthi uHunter Biden, umtaka Joe Biden, wenza ubukhohlakali kwele Ukrainne ngesikhathi esebenzela inkampani yokuphehla umlilo kagetsi kulelolizwe.

Abakubandla lama Democrats bathi uTrump wenza lokhu efuna ukungcolisa igama lika Joe Biden okukhanya engani uzancintisana laye kukhetho oluzayo. UTrump uyakuphikisa lokhu esithi abakubandla lama Democrats lokhu bezondele ukuthi wanqoba kukhetho ngomnyaka ka2016.

Abaphikisa ibandla lakhe bathi wenza ubukhohlakali obesabekayo. Abanye abake bathoniswa edale leSenate bekhokhela ilizwe leMelika bagoqela uMnu. Richard Nixon loMnu. Bill Clinton.

Ukuze sihlaziye udaba lolu, sixoxe loMnu. Den Moyo, ingcwethi kwezombusazwe ezimele yodwa, othi abakubandla lama Republicans bakhanya bengafuni ukuthi kube labafakazi edale leSenate.

Kuthoniswa Icala Lokuthi uTrump Wenza Okungekho Emthethweni
please wait

No media source currently available

0:00 0:01:50 0:00


XS
SM
MD
LG