UMongameli Emmerson Mnangagwa ugcobe abaphathintambo labasekeli babo kodwa lokhu kungakaziwa ukuthi yena uzamsekela ngobani.
Ekhokhela lumkhosi State House ngoMvulo okugcotshwe khona lomtshutshisi omkhulu, uProsecutor General emkhosini owenzelwe, abaphathintambo abangamatshumi amabili lanye bafunge phambi kuka Mnangagwa ukuba bezoqhuba umsebenzi wabo ngemfanelo kulandelwa isisekelo sombuso.
UMnangagwa utshele intathelizindaba ngemva kokufungisa abaphathintambo laba labanye ukuba le kuzokuba yiyona Cabinet ekhethiweyo ukuqedisa isikhathi sephalamende kungakayiwa kukhetho.
Omunye wabafungisiweyo laba nguNkosikazi Sithembiso Nyoni osezokhokhela ugatsha lwabesifazane oselumanyaniswe lolwabatsha.
UNyoni uthi bangakhathazeki abesifazane ukuba balutshwana kudale leli.
Okhethwe ukuba ngumphathintambo wedolobha lako Bulawayo ehofusini kamongameli, uNkosikazi Angeline Masuku, ukugcizelele lokhu wakhuthaza abesifazane ukuba baphatheka kwezombusazwe ukuze bande banelise ukusukumisa indaba zabo.
UMnumzana Obert Mpofu, yena okhethwe ukuba ngumphathintambo wezenzakala phakathi kwelizwe (Home Affairs), uthe ukubuyiselwa kwakhe kusikhundla sinye, kuzomsiza ekuthini aqedise lezonhlelo abezihlelile ukuzifeza kuhulumende kaMnu. Robert Mugabe.
Akakabi khona umphathintambo wezokukhitshwa kwemibiko lokusakaza. Owayekhethiwe, uMnu. Chris Mutsvangwa, waba ngabanye babakhethwa ukuba ngabacebisi bakamongameli.
UMnangagwa wayekhethe abaphathintambo abedlulisa abayabe bengela zikhundla zokuba ngabammeli bedale lephalamende, okwenza asuse abanye abafana loMutsvangwa.
UMnangagwa elokhu engakakhethi abazamsekeli osekusenza abanye bacabangele ukuthi uzakhetha umkhokheli webutho, uGeneral Constantino Chiwengwa.
Uzulu weHarare uthi bekunzima kuMnangagwa ukukhetha amalunga edale labaphantintambo njengoba bekumele ajabulise labo bantu abamsize ukuba kulezo sikhundla asekiso.
Abakhulume kumsakazo we VOA Studio 7 bathi bamangaliswa ngamanye amagama abantu abakuqula labaphathintntambo elifungiswe.
Bathe kusobala ukuthi uMnangagwa kalalelanga izicelo zikazulu zokuthi kumele idale leli libe labantu abangakaze bangene kuhulumende kube labanye abavela kwamanye amabandla.
Omunye walaba bantu, uMnu. Zisunko Ndlovu, usole kakhulu ukungeniswa kwabantu abanjengo Major General Sibusiso Moyo owethulela uzulu kumabonakude weTV ukuthi ibutho selithuthune intambo zombuso.
Abanyenjalo bakhonone ngokungena kulelidale kuka Air Marshal Perrence Shiri owayekuvuyo leGukurahundi.
Bathe ukumfaka kudale leli kusolwa ngabantu abanengi abagongodwa libutho leli ngesikhathi ibandla leZanu PF lilwisana lele Zapu ilizwe lisanda kuthola uzibuse.
