amalinks wokungena

Breaking News

Umthethwandaba Ulahla Isicelo Sabantwana Baka Robert Mugabe Ukuba Kungagejwa Isidumbu Sakhe Egumeni Lakhe


Amasotsha athwele isidumbu sikamuyi uRobert Mugabe, owangcwatshwa eZvimba, Zimbabwe, Sept. 28, 2019. (C. Mavhunga/VOA)

Umantshi eChinhoyi uthi kungaqhubekela phambili ukugejwa kwesidumbu sowayengumongameli, uRobert Mugabe, owangcwatshwa emzini wakhe esigabeni seZvimba.

UNkosikazi Ruth Moyo wethule isinqumo lesi kulandela ukuphanyekwa emthethwandaba kwaloludaba ngabantwana bakamuyi - uBona Mugabe, Tinotenda Robert Jnr loBellaimine Mugabe - abaphikisa okwethulwa yinduna uZvimba othi uMugabe wangcwatshwa ngedlela eyephula amasiko esigaba lesi.

UZvimba wathi uNkosikazi Mugabe ulecala lokungalandeli amasiko esintu sabo akubeka sobala ukuba umuntu akumelanga angcwatshwe egumeni.

Umatshi uthe abantwana bakamuyi akumelanga bangene kudaba lolu ngoba bebevele bengekho phakathi kwalo uZvimba esethula isigwebo sakhe esigoqela ukuba kumele ahlawule inkomo ezinhlanu lembuzi ezimbili njalo abone ukuba isidumbu sikamuyi siyagejwa sihanjiswe eNational Heroes Acre eHarare.

Umdeni wako Mugabe wavumelana ukuba angcwatshwe emzini wakhe hatshi emathuneni amaqhwe eHarare ngoba wayevele efisa ukuba ingcwaba lakhe libeduzane lelika nina eZvimba.

UNkosikazi Grace Mugabe usephanyeke emthethwandaba udaba lokuthi kumele kugejwe amathambo kamuyi uRobert Mugabe, owangcwatshwa egumeni lakhe eKutama ngomnyaka ka2019.

Abantwana bakhe baphanyeka udaba lolu emthethweni bezama ukuthi kwesulwe isinqumo senduna uZvimba.

UNkosikazi Mugabe wake watshela intathelizindaba ukuba induna le kayimnikanga ngemfanelo amasamanisi njalo wamgweba engakathonisi icala leli.

Uhulumende wavumela umdeni wako Mugabe ukuba umgcwabe eKutama hatshi eNational Heroes’ Acre okwakusakhiwa isihonqo okwakumele angcwatshwe khona.

Kasenelisanga ukukhuluma lomdeni kaMugabe ngodaba lolu kodwa igqwetha elimele imuli yakhe, uMnu. Fungai Chinwamurombe, uthi uzakuzwa ngomdeni wako Mugabe ukuba aluphathe njani udaba lolu.

Kukhangelelwe ukuba uzaluphanyeka edale leHigh Court.

Facebook Forum

XS
SM
MD
LG