amalinks wokungena

Breaking News

‘Izenzo Zebutho loMugabe Sezithundubeze Okungenziwa yiSADC’


Ingcwethi zomthetho eziseBotswana zingezicubungula ngezombusazwe, zithi inhlanganiso yomanyano wamazwe angezansi yezwekazi leAfrica eyeSouthern African Development Development (SADC) ayisela sizatho sokungenela kudaba lweZimbabwe ngemva kokuba uMongameli Robert Mugabe ebike ngeSonto ntambama ukuthi ibutho alizami ukugenqula umbuso wakhe okungekho emthethweni.

Elinye lamagqwetha la njalo engocubungula ngezombusazwe, uMnu. Antony Morima, utshele iStudio 7 ukuthi akusela sizatho sokuthi inhlanganiso yeSADC iqhubeke ingenela kungxaki zombusazwe eZimbabwe.

Ugatsha lwenhlanganiso yeSADC olubona ngezombusazwe, umvikela kanye lokuthula, olwe SADC Troika on Politics, Defence and Security, luyahlangana esigodlweni seAngola ngoLwesibili ukucubungula udaba lweZimbabwe.

Kodwa uMorima uthi asikho sidingo sokuthi iSADC ibe ilokhe ingenela kundaba zeZimbabwe ngoba okwenzakalayo kuludaba lomdeni.

"Ukungenela kweSADC akusatsho lutho. Ekuqaleni bekucatshangelwa ukuthi kulokuzama ukugenqula umbuso kamongameli Robert Mugabe okungekho emthethweni, kodwa njengoba sizwile langaye umongameli Mugabe, akulalutho olunjengalokho. Ngokunjalo unyawo lokuthi kulokugenqula umbuso okungekho emthethweni, alusami."

UMorima uqhubeke esithi inhlanganiso yeSADC yehluleka esikhathini esidluleyo, ukuncedisa ngesikhathi ifunakala endabeni zeZimbabwe.

"Ngesikhathi kukhona ingxaki okwakumele iSADC ingenele, yehluleka, ikhona ubuya khathesi. AbeZimbabwe basendleleni yokulungisa udaba lwabo, ngakho abayekelwe bekuleyondlela."

Isizalwane seZimbabwe, unkosikazi Emma Ndlovu uthi inhlanganiso yeSADC iyacunula ngoba ibe ingekho ngesikhathi idangakala eZimbabwe, ifika ngesikhathi ingadingakali.

"Okwakhetesi iSADC ifunani, kade sasihlupheka sibafuna, kayizange ingenele. Khathesi isifunani sesizama ukuzilungisela sebebuya begijima. Abasiyekele silungise indaba zomndeni azingenwa, ngezo mdeni."

I-SADC Troika ilamazwe aweAngola engumngcinisihlalo, iTanzania kanye leZambia, kukanti eleSouth Africa lingena ngoba liphethe isikhundla sokuba ngumgcinisihlalo weSADC jikelele.

Inengi lizalinda ukuthi lizwe ukuthi iTroika izaphuma lesinqumo bani, ngesikhathi inengi liqinisa ngokuthi iSADC ayimele khatshana edabeni lezehlakalo ezilokhu zitshombuluka njenge tshongololo mihla ngemihla eZimbabwe.

Facebook Forum

XS
SM
MD
LG