Iziphathamandla zelizwe leZimbabwe zithi namuhla lusuku oluqakathekileyo lokulwisana lezijeziso zenotho ezetheswa inkokheli yebandla leZanu PF ngamazwe entshonalanga. Abalandeli bebandla leZanu PF bathi kazesulwe izijeziso lezi kodwa abanye abakumandla aphikisayo kabakusekeli lokhu.
Usuku lolu lonyaka lunanzwa ngaphansi kwesihloko esithi ‘Resilience, Progress and Solidarity Under an Environment of Sanctions’. Akulamicimbi kazulu eqoqwe namuhla kusesatshwa ukuthi abantu bangathapha igciwane leCOVID-19. Kubelomcimbi wezemiculo izolo obekulabaculi abedlula amatshumi amathathu abahlabele ingoma ezitshiyeneyo ebeziphuma kumabonakude oweZBC.
UMongameli wakwele Mozambique, uMnu. Philipe Nyusi, wethule umbiko namuhla esithi kumele izijeziso zenotho lezi zesulwe ngoba sezibhidliza umnotho welizwe leZimbabwe. Lokhu kusekelwe ngumongameli wakwele South Africa uCyril Ramaphosa, uMongameli John Magufuli wakwele Tanzania, umongameli wakwele Kenya uMnu. Uhuru Kenyatta loMongameli Hage Geingob wakwele Namibia.
UMongameli Emmerson Mnangagwa uthi izijeziso lezi kumele zesulwe.
UNkosikazi Judith Ncube, umphathintambo wedolobho lakoBulawayo, ugcizelele esithi izijeziso lezi zikhahlameza uzulu.
UNkosikazi Ncube uthi izijeziso zenotho zihlupha lamazwe akuzwekazi leSouthern African Development Community.
Uthi kumele abantu bekhulumisane ngezijeziso lezi.
Lokhu kusekelwa ngabanye njalo abalandeli bebandla leZanu PF, abagoqela uMnu. Believe Gaule.
UMnu. Khaliphani Pugeni, isikhulumeli sikamongameli webandla leMDC-T, uthi kazincedi lutho izijeziso zenotho lezi.
Osakhulayo ohlala eDete, uShadreck Diego, uthi uma umkhankaso wokwesulwa ungaphumelela ulakho ukuthuthukisa ilizwe.
Kodwa bakhona abathi izijeziso zenotho kazihambelani lendlela ilizwe leZimbabwe elibuswa ngayo. UMnu. Fidelis Moyo, owalwa impi yenkululeko uthi bayazehlulekela ababusa ilizwe leli.
Olwela amalungelo kazulu, uMnu Mbuso Fuzwayo, uyakusekela lokhu.
Umongameli webandla leMthwakazi Republic Party, uMnu. Mqondisi Moyo, uthi uhulumende udlala ngabantu.
Uhulumende wakwele Melika lamanye amazwe afakela inkokheli yebandla leli izijeziso isithi bephula amalungelo kazulu njalo benza ukhetho olungakhululekanga.
