amalinks wokungena

Breaking News

Batshengisela Phandle Kwesigodlo seMelika Besithi Kazesulwe Izijeiso Zenotho Ezafakelwa Abakubandla leZanu PF


Batshengisela phandle kwesigodlo seMelika ePretoria besola izijeziso zenotho. (Photo: Benedict Nhlapho)
Batshengisela phandle kwesigodlo seMelika ePretoria besola izijeziso zenotho. (Photo: Benedict Nhlapho)

Ihlekana lezizalwane zeZimbabwe ebelimanyene labalutshwana abebemele ibandla elibusayo eleAfrican National Congress, batshengisele namuhla esigodlweni seMelika kwele South Africa besithi kumele zethule izijeziso zenotho ezetheswa abanye abalandeli bebandla leZanu PF.

Leyingcosana yezizalwane zeZimbabwe ebitshengisela esigodlweni seMelika ePretoria besithi uhulumende weMelika esule izijeziso lezi.

Isikhulumeli sebandla leZANU PF kwele South Africa, uMnu. Kennedy Mandaza, ongomunye wabaqoqe ukutshengisela lokhu, uthi akuqondanga ukuthi iMelika isizenza ipholisa lokubheka amanye amazwe ukuthi enzani lokuwajezisa.

“Sithi iAmerica ayisuse izijeziso lezi ngoba zephula amalungelo ethu.”

Omunye wabatshengisele endaweni le, uNkosazana Gugu Ncube, olilunga lebandla leZANU PF, uthi izijeziso lezi azisizi lutho.

“Sikhathele ngama sanctions. Amasanctions awazwisi ubuhlungu any bantu abaphezulu. Azwisa thina abantu abaphansi ubuhlungu omama, ogogo labantu abakhubazekileyo. Sithi phansi lawo amasanctions.”

Umkhokheli webandla eliphikisayo eleIDEAL Zimbabwe, uMnu. Tinashe Jonasi, laye obetshengisela, uthi iZimbabwe ayidingi ukutshelwa ngelinye ilizwe ukuthi yenzeni.

“Lezi zijeziso zitsho ukuthi iMelika iyasihlasele ngakho kufuze sizivikele.”

Obemele ibandla elibusayo kwele South Africa, uMnu. Legoete Dakota, laye ukhuthaze ukuthi izijeziso lezi zesulwe esithi iSouth Africa isithwele nzima ngezizalwane zeZimbabwe esezikhitshwe elizweni yikuhlupheka okubangelwe yilezi zijeziso.

“Abantu beZimbabwe bagcwele yonke iregion yethu yeSADC. Bakhona eMzansi, bakhona eButswana, Bakhona eZambia. Abantu baseZimbabwe bayasokola baphila kanzima ngenxa yamasanctions.”

Kodwa ke isikhulumeli sebandla leMthwakazi Liberation Front, uMnu. Chrispen Nyoni, uthi ngamanga aluhlaza ukuthi izijeziso ezetheswa iziphathamandla zeZanu PF yizo ezibangela inhlupho ezikwele Zimbabwe.

“Abalanhloni ngalokhu abakwenzayo njalo ngendlela abaqamba ngayo amanga. Amasanctions aqondiswe kubo bona kuyindlela yesigwebo ngalokhu abakwenzayo lalokhu abakwenzayo.”

Kusenjalo, abebetshengisela laba behlulekile ukutshiya ugwalo lwezikhalazo lwabo esigodlweni seMelika njengoba bekuvaliwe.

Okuhlangothi lweMelika olubona ngobudlwelwano lamazwe akuzwekazi leAfrica, uMnu. Matthew Harrington, uthi eleZimbabwe liyakwazi okumele likwenze ukwenzela ukuthi zesulwe izijeziso zenotho.

Kulabantu abafika phose ikhulu – 83 abaphansi kwezijeziso zenotho lezi lamankampani adlelana lenkokheli yeZanu PF afika phose amatshumi amane – 37.

Udaba Esilethulwe nguBenedict Nhlapho
please wait

No media source currently available

0:00 0:03:43 0:00


XS
SM
MD
LG