Izikolo zivuliwe ilizwe lonke ngoLwesibili kodwa ababalisi abanengi ikakhulu abasebenzela uhulumende abakaqali ukufundisa besithi bafuna umqhatshi abengezelele iholo lona abathi kaleneli imuli zabo.
Ababalisi ezikolweni zikahulumende eHarare abemelwe zinhlanganiso ezithi eyeZimbabwe Teachers Union (ZIMTA), Progressive Teachers Union (PTUZ) leAmalgamated Rural Teachers Union (ARTUZ) bathethe isinqumo sokuthi kabayi emsebenzini kuthi labo abayabe benelisile ukuba sezikolo bazabe bezihlalele.
Ngemva komhlangano owenziwe phakathi kukahulumende lenhlanganiso emela izisebenzi eyeApex Council, uhulumende uthe kenelisi ukwengezelela izisebenzi iholo ngenxa yokuswelakala kwemali.
Umbalisi ofundisa kwesinye isikolo eKuwadzana eHarare uveze ukuba bebesezikolo kodwa abafundisanga ngenxa yezikhalazo abalazo.
“Ukufundisa kunzima sibili asingeke sifundise ngoba uhulumende laye kagcwalisi izifiso zethu. Kunzima ukuthi ugeze uhambe emsebenzeni uyekhuluma labantwana ungadlanga. Lokhe sizimele singamaqembu sibona ukuthi kungenziwani. Iviki izaphela size sibone ukuthi yena uhulumende umi ngaphi.”
Omunye njalo umbalisi weHarare, uNkosazana Mellisa Chingwanangwana, uthi akazange azihluphe ukuya emsebenzini.
“Namhla izikolo bekumele zivulwe kodwa thina njengabablisi asiyi emsebenzini ngoba imali esiyiholaya ayenelisi ukuthi sithole imali yetransport, sibhadale indleko zesikolo. Ngakho-ke sizazihlalela singayi emsebenzini izikhalazo zethu zize zizwakale.”
Lokhu kusekelwe yisikhulumeli seRTUZ, uMnu Nation Mudzitirwa, yena othi uhulumende kumele alalele izikhalazo zababalisi.
“Namhla abablisi abengi abakwanisanga ukuya emsebenzi. Akula kufunda okwenzakalayo. Siyacela ukuba uhulumende angele masinya abhadale ababalisi imali abayifunayo.”
Omunye umbalise ofundisa emangweni weBinga, ongathandanga ukuvezwa igama lakhe, uthe ababalisi abanengi kade bengafundisi ngoba bafuna iholo elikhuphukileyo.
“Ngapha eBinga akulababalisi. Ababilisi abalamali yokuthi beze esikolo, so kunzima mfowethu ngapha.”
Abazali abanengi bebedanile ngalokhu. Omunye wabo kunguMnu Alphoius Mapuranga yena othi uhulumende sokumele akhangelisise loludaba.
Ababalisi bathi bafuna iholo labo lilinganiswe lemali ababeyihola ngesikhathi sombuso kamuyi uRobert Mugabe lamakhulu amane lengxenye yamadollar eMelika -US$450 kodwa uhulumende uthi kalenelisi leliholo ngoba engela mali.