amalinks wokungena

Breaking News

EleMelika Lidla Amalahle Ngokwethulwa Libandla leZanu PF Ngezijeziso Zenotho


Senator Jim Risch

Ikhomithi yedale leSenate ebona ngokudlelana lamanye amazwe eyeForeign Relations Committee ithi omele ilzwe leMelika eZimbabwe, uMnu. Brian Nichols ukhuluma iqiniso nxa esithi okuhlupha ilizwe leZimbabwe yikwehluleka ukubusa hatshi izijeziso zenotho ezafakelwa inkokheli yebandla leZanu PF.

UMnu. Jim Risch, umgcinisihlalo wekhomithi le, usanda kwethula umbiko enkundleni yeTwitter abike khona ukuthi uziquthele uhulumende kaMongameli Emmerson Mnangagwa ngoba wehluleka ukubusa ngemfanelo.

URisch uthi uNichols wethule iqiniso ngokuveza ukuthi uhulumende wakwele Zimbabwe wephula ilungelo likazulu mahlayana njalo kugcwele ubukhohlakali obumemethekiswa kakhulu ngamalunga kahulumende.

Ibandla leZanu PF lisanda kwenza umkhankaso ibambane lamazwe akumanyano weSouthern African Development Community wokuthi kwesulwe izijeziso lezi.

Amalunga ebandla leli lokhu esithi eleMelika kumele lesule izijeziso zenotho ezafakwa ngamazwe entshonalanga. Omunye wabalo mbono lo nguMnu. Believe Gaule othi bazalwisana lezijeziso lezi ngamandla.

Kodwa-ke uMnu. Andrew Nyathi, unobhala jikelele webandla leUnited Democratic Movement, uthi uzulu kumele alungise okuhlupha ilizwe leZimbabwe hatshi ukuthukana lelizwe leMelika.

UMnu. Collins Bajila, ilunga lebandla leMovement for Democratic Change elikhokhelwa nguMnu. Nelson Chamisa, ulombono ofanayo.

Ilizwe leMelika lithi uhulumende weZimbabwe kumele engephuli ilungelo likazulu njalo aqhube ukhetho olubalulekileyo lokunye okumbalwa nxa efuna ukuthi kwesulwe izijeziso zenotho ezafakelwa inkokheli yebandla leZanu PF.

Facebook Forum

XS
SM
MD
LG