amalinks wokungena

Breaking News

Ian Khama: Kumele Kuvinjwe Ukumemetheka Kokungethembeki eZimbabwe


UMnu. Ian Khama labanye abantu abasemhlanganweni weCZI.

Owayengumongameli wakwele Botswana, uMnu. Ian Seretse Khama, usekhuthaze amankampani ukuba ehlukane lemisebenzi yenkohlakalo ukuze kuvuselelwe umnotho welizwe.

UMnu. Ian Khama usemhlanganweni weConfederation of Zimbabwe Industries.
UMnu. Ian Khama usemhlanganweni weConfederation of Zimbabwe Industries.

UKhama wethule lokhu emhlanganweni omkhulu wenhlanganiso yabasomabhizimusi oweConfederation of Zimbabwe Industries (CZI) 2018 Annual Congress and International Investment Forum owenzelwa koBulawayo.

Uthe ukungethembeki kubhidliza umnotho welizwe ngakho-ke kumele osomabhizimusi, isiphathamandla zikahulumende labaqondisi bamankampani bengavumi ukufumbathiswa.

Kulabantu abanengi emhlanganweni weCZI.
Kulabantu abanengi emhlanganweni weCZI.

Ukungethembeki ngokunye kwalokho uMongameli Emmerson Mnangagwa othi ufisa ukulwisana lakho.

Umqondisi wenkampani yeUnited Refineries, uMnu Busisa Moyo, uvumelane loKhama esithi ngempela ukungethembeki sobubulele umnotho welizwe.

Umhlangano walonyaka weCZI.
Umhlangano walonyaka weCZI.

“Ubugwelegwele kumele buphele sivumelana lakho noba yonke into esiyenzayo iphelela lapho. IZimbabwe ngeke ithuthuke uma singayitshayanga ekhanda inyoka le esiqede amatsiyane.”

UMoyo uphinde wakhuluma kabanzi ngomhlangano lo oqale ngoLwesithathu.
“Umhlangano wethu umi kuhle kakhulu uyaqhela sekulomhlangano wokutshala imali njalo labanye abanena lumhlangano basuka kwamanye amazwe.”

Umhlangano weConfederation of Zimbabwe Industries.
Umhlangano weConfederation of Zimbabwe Industries.

Umphathintambo kahulumende obona ngokwenzakala koBulawayo, uNkosikazi Judith Ncube, ukhuthaze ukuba osomabhizimusi basekele umbono kaMnangagwa wokuvuselela ezamabhizimusi kusiyafika umnyaka 2030.

“Kuyajabulisa ukubona osomabhizimusi beqhuba imihlangano enje ngemizamo yokuvuselela umnotho welizwe. Esikukhangeleleyo kini yikuba lisebenze gadalala lilandela inhlelo kaMongameli Mnangagwa yokuba ngomnyaka ka2030 kubesekulentuthuko ethile ezweni esuthisa uzulu”

Usomabhizimusi wakoBulawayo, uMnu Obert Sibanda, ubuke umhlangano walonyaka ngokuzimisela kwabantu ekuvuseleleni amankampani avalwayo.

“Siyabonga ngokuba lomhlangano kulelidolobho. Okuthokozisayo yikuzinikela kwabosomabhizimusi ukuba bavuselele ezomnotho kanye lamankampani asavalayo inengi lawo likuleli dolobho.”

Umphathintambo wezamafekithali uMnu. Nqobizitha Mangaliso Ndlovu.
Umphathintambo wezamafekithali uMnu. Nqobizitha Mangaliso Ndlovu.

Umhlangano weCZI walonyaka uqhutshwa ngaphansi kwesihloko esithi ‘From Dialogue to ImplementationI It’s Time to Act’.

Umhlangano lo uzagqitshwa ngoLwesihlanu.

Kulo umhlangano kulemibukiso yempahla lamabhizimusi eyehlukeneyo eyenziwa ngamankampani angamalunga eCZI.

Umhlangano walonyaka ujonge ukukhuthaza ukusebenzelana kwamabhizimusi lokuvuselela amabhizimusi eZimbabwe.

Abanye abangene umhlangano lo bagoqela umphathintambo wezentuthuko yamafekithali uMnu. Mangaliso Ndlovu, umqondisi webhanga leCABS uSimmon Hammond, umphathintambo wezokulima uMnu. Perence Shiri, usibalukhulu webhanga lesizwe uMnu. John Mangudya lomqondisi wenkampani yeCrystal Candy uJimmy Psillos.

Laba bakhangelelwe ukuthi bazakwethula imibiko yabo emhlanganweni lo ngoLwesihlanu.

Udaba Esilethulelwe NguAnnastacia Ndlovu
please wait

No media source currently available

0:00 0:05:17 0:00

Facebook Forum

XS
SM
MD
LG