Umeya wedolobho lako Bulawayo, uMnu. Solomon Mguni, uthi uhlangothi lukahulumende olubona ngezamadolobho lulungiselela ukuhlolisisa ukwenzakala koBulawayo kulandela ukumiswa umsebenzi kuka mabhalane wedolobho leli nguMnu. Tinashe Kambarami, obebambe isikhundla sika meya okwesikhatshana.
UMguni utshele iStudio 7 ukuthi kukhangelelwe ukuthi izithunywa zohlangothi lolu zizaqala umsebenzi ngoLwesine.
Uthi okwamanje umabhalane wedolobho lakoBulawayo, uMnu. Christopher Dube, usebuyele emsebenzini lobanje uKambarami ubesala lamakhiye okuvula iwofisi yakhe.
Ibandla leMDC elikhokhelwa nguMnu. Nelson Chamisa likhuthaza ukuthi uDube abiselwe emsebenzini lisithi ukumiswa kwakhe umsebenzi akwenziwanga okusemthethweni.
Uhlangothi lukahulumende lolu luvame ukumisa umsebenzi amakhansila emadolobheni akhokhelwa libandla leMDC.
Kasenelisanga ukukhuluma loKambarami kanye leziphathamandla zikahulumende ngalokhu.
UMguni uthi akwaziwa okuzakwethulwa luhlangothi lolu kulandela ukuhlolisisa okwenzakala kukhansili yako Bulawayo.
Kusenjalo, abalandeli bebandla leMDC bathembisa ilizwe lonke ikakhulu abantu bakoBulawayo ukuba bazokwenza konke okusemandleni abo ukuxazulula inkinga zokufuthelana ezibhekane lomanisiphala walelo dolobho kulandela ukuxabana kukamsekeli kaMeya loDube.
