amalinks wokungena

Breaking News

USolwayo Ngwenya Uthi iCOVID-19 Elolaka Ilakho Ukumemetheka Kakhulu eZimbabwe


USikhwicamfundo Solwayo Ngwenya uxoxa loGibbs Dube weStudio 7 kuhlelo Zimbabwe Today - Asixoxeni olwethulwa enkundleni yokuxhumana kukhasi leVOA Ndebele (VOA)

Uhlangothi lwezempilakahle lubika ukuthi abantu abalitshumi lantathu – 13 babulewe ngumkhuhlane we-COVID-19 eZimbabwe ngoM kwathi abedlula ikhulu lamatshumi amahlanu – 56 bahlolwe batholakala bele covid-19.

Uhlangothi lolu lubika ukuthi sokulabantu abafika phose inkulungwane lengxenye – 1,316 asebebulewe ngumkhuhlane lo kusukelwa ngoMbimbitho nyakenye.

Luthi abantu abedlula inkulungwane ezingamatshumi amathathu 34,487 bahlolwa batholakala belomkhuhlane lo ngesikhathi esifanayo. Kunani leli, sokulabedlula inkulungwane ezingamatshumi amabili lanhlanu – 28,383 asebaphepha kumkhuhlane weCOVID-19 eZimbabwe.

Isibhedlela seJohns Hopkins University sibika ukuthi kulabantu abedlula izigidi ezilikhulu – 103 million asebatholakala emhlabeni wonke jikelele bele COVID-19. Sokwabhubha abedlula izigidi ezimbili – 2,3 million.

Kwele zimbabwe, ingcwethi kwezempilakahle zithi igciwane le COVID-19 elilolaka elaqala kwele South Africa lilakho ukumemetheka eZimbabwe.

USikhwicamfundo Solwayo Ngwenya, osebenza esibhedlela seMpilo Hospital, utshele umsakazo weStudio 7 ukuthi umkhuhlane lo uphose ufane lefuleza eyebulala abantu abanengi emhlabeni wonke jikelele eyeguqula isimo sawo yamemetheka okwethusayo.

Facebook Forum

XS
SM
MD
LG