amalinks wokungena

Breaking News

'Sicela uMongameli Ramaphosa Axolele Bonke Abantu Abahlala eSouth Africa Bengelamvumo'


FILE: Izizalwane zeZimbabwe ezibalekela udlakela kwele South Africa zidluliswa emgceleni weZimbabwe leSouth Africa.

Ngesikhathi izizalwane zakwele South Africa bezithe gwaqa endaweni zonke zelizwe zinanza ilanga lamalungelo oluntu, ele Human Rights Day ngoLwesithathu, inhlanganiso elwela amalungelo ezizalwane zakwamanye amazwe kwele South Africa eye African Diaspora Forum isicele uhulumende ukuthi axolele bonke abakwamanye amazwe abaselizweni ngokungekho emthethweni.

Inhlanganiso ye African Diaspora Forum ibhalele uMongameli Cyril Ramaphosa incwadi icela ukuthi bonke abaselizweni ngokungekho emthethweni benzelwe uxolo baphiwe imvumo yokuhlala ngokusemthethweni.

Nomanje uhulumende wakwele South Africa wapha uxolo olufanayo kuzizalwane zeZimbabwe kwabhalisa kuphela abazinkulungwane eziphose zifike amakhulu amabili, abeZimbabwe abakweleSouth Africa ngokungekho emthethweni lokhe kuyibo abanengi okwedlula abavela kwamanye amazwe.

Ngokutsho kukamgcinisihlalo wale inhlanganiso, uMnu. uMnumnzana Marc Gbaffou,amalungelo alabo abaselizweni ngokungekho emthethweni ephulwa nsukuzonke ngoba kuthiwa abalasabelo kuleli.

Umgcinisihlalo wenhlanganiso yeZimbabwe Community in South Africa, uMnu. Ngqabutho Mabhena, uthi njengezizalwane zeZimbabwe babona leli kulicebo elihle njalo ilanga lokunanza amalungelo lithuba elihle lokwethula isicelo esinjengalesi.

“Isisekelo seSouth Africa kantike le Freedom Charter ithi yona iSouth Africa ngeyabantu bonke abahlala khona. Lokho kutsho ukuthi lezizalwane ezivela kwamanye amazwe. Yikhoke sisebenzisa lolu usuku lwalamhlanje ukuthi sikhulume ngalezi izinto kuhulumende weSouth Africa ukwenzela ukuthi amalungelo abantu beZimbabwe abalapha eSouth Africa ahlonitshwe njengoba sihlonipha amalungelo ezizalwane zaseSouth Africa.”

Encwadini yayo inhlanganiso ye African Diaspora Forum ithi sekuleziphepheli ezinengi ezicine seziselizweni ngokungekho emthethweni ngenxa yokuthi bezihamba isiphinde phinde zisiyakwengezelela amalanga encwadini zazo kodwa zaphendulwa emuva zaze zadela.

Ithi njalo izehlakalo zonke ze xenophobia esezike zenzakala elizweni ziqalwa yilabo abathi abakwamanye amazwe baselizweni ngokungekho emthethweni.

Phezu kwalokho ithi uhulumende uchitha imali enengi ebopha, ukugcina lokuphindisela emuva abakwamanye amazwe laba, okuyimali ebingasiza abampofu kweleSouth Africa.

Ithi labo abalenhlanhla yokuthola imisebenzi, bazithola sebesetshenziswa njengezichaka bephiwa iholo elingatsho lutho.

Inkuthazo ye African Diaspora Forum le isiyemukelwe ngezandla zombili yizizalwane zeZimbabwe ezithi malanga onke zibhekana lalezi inhlupho ezibaliswa yile inhlanganiso. Kodwa esinye isizalwane seZimbabwe, uMnu. Greatman Mkhwebu, uthi akaboni ukuthi ukuthola amaphepha kuzakuba lusizo olukhulu kuzizalwane zeZimbabwe.

“Lento yamalungelo njengoba lamhlanje kuyiHuman Rights Day mina angiboni isisiza kakhulu ikakhulu thina abantu baseZimbabwe. Sometimes loba ulawo amaphepha lawo bayakutshela ukuthi lisuka khonale eZimbabwe lizosiqedela izinto la. Ubonakala sengathi ngumuntu ozomotsha lapha elizweni ozothathela abantu amalungelo abo. Sometimes kuyantshontshwa la ma sekuntshontshiwe kuthiwe ngabantu baseZimbabwe.”

Kodwake esinye isizalwane seZimbabwe, uNkosazana Mercy Mvundla, uthi ukuthola amaphephala kungalamulela abanengi.

“Kulokuhlukumezeka okuthile esihlangabezana lakho emakilinika ezibhedlela. Bayahlukumezeka kakhulu abantwaba ezinye izikolo abavunyelwa kuzona. Lokuthola ukuhlonitshwanje njengomuntu. Ikakhulukazi uthole ukuthi ngabantu bomthetho or ngithi amapholisa uthole usuhlukumezeka kakhulu. Nxa bengasikhangelela kulokho lathi sithole ukucatshangelwa.”

Ngesikhathi uhulumende weSouth Africa ememezela ngo 2010 ukuthi abeZimbabwe abaselizweni ngokungekho emthethweni abeze bazothola imvumo, inengi lesaba licabanga ukuthi leli liqhinga lokubabopha, abanye behlulwa yikuswela incwadi zokuzalwa lamaphasipoti kanti kukhona ababesithi abazidingi lezi incwadi.

Inengike lithi lelinyathelo loxolo nxa lingaphumelela, lizasiza kakhulu abeZimbabwe laba ikakhulu abantwababo abadinga incwadi zokufunda kweleSouth Africa.

Facebook Forum

XS
SM
MD
LG