amalinks wokungena

Breaking News

Odokotela Bathi Kumele Abantu Bavikele Wonke Umuntu Kumkhuhlane weCOVID-19


Kuhlolwa owesifazana ocatshangelwa ukuthi ulegciwane leCOVID-19..

Odokotela bathi abantu abalomkhuhlane weCOVID-19 kumele baziphathe kahle sonke isikhathi ezindlini zabo njalo lemphakathi.

Bathi kuqakathekile ukuthi bagqoke ama masks njalo bahlale behlanzekile ukuze bangamemethekisi igciwane leCOVID-19.

UDokotela Rudorwashe Gumbo uthi zinengi indlela zokuzivikela njalo lokuvikela uzulu ukuthi engaguli umkhuhlane lo osubulele abantu abanengi eZimbabwe.

Uthi abantu kumele bacabangele abanye nxa besuka ezindlini zabo besiyadina okutshiyeneyo ezitolo, ukuyakukha amanzi, bengena emabhasini lokwenza okunye okutshiyeneyo.

Kusenjalo, uSikhwicamfundo Solwayo Ngwenya, umqondisi wenhlelo eMpilo Hospital, uthi kwephula inhliziyo ukubona abantu bengazivikieli kumkhuhlane weCOVID-19.

Kulabantu abedlula kancane inkulungwane abatholakale belomkhuhlane weCOVID-19 koBulawayo.

Abedlula amakhulu amahlanu - 514, lokhu begula lumkhuhlane, kodwa sokusinde abafika phose amakhulu amahlanu lamatshumi amane – 536 kuthi-ke abangamatshumi amabili lantathu-23 sebelahlekelwe ngumpefumulo ngenxa yaleligciwane.

Ukuqansa kwenani lasebetholakale beleCovid-19 edolobheni lakoBulawayo kwenzakala ngesikhathi uhulumende eqinisa iziqondiso zeLockdown ngokwalela abantu ukuhambahamba phakathi kwehola lesithupha ntambama kusiya kuhola lesithupha ekuseni.

Amavinkili lamanye amabhizimusi asevalwa ngehola lesithathu emini ukwenzela ukwehlisa inani labangabanjwa iCovid-19.

EMatabebeland South kulabantu abaphose befike amakhulu amahlanu, 474 abalegcikwane leCOVID. Abangamatshumi ayisikhombisa lasithupha sebasila kuthi ababili babhubha.

Facebook Forum

XS
SM
MD
LG