EleBhilitani selimise ukungena kwendizamtshina ezivela eZimbabwe kanye lamanye amazwe amahlanu angezansikwezwekazi leAfrica ngesikhathi lisaphenya ukuqhamuka komkhakha omutsha wegcikwane leCOVID-19 obizwa ngokuthi B1.1.529, otholakale kwele South Africa.
Kwele Bhilithani babika ukuba umkhakha lo ulolaka oluphindiweyo ukwedlula eminye ethe yaba khona. Abe Israel labo sebemise abantu babo ukwethekelela amazwe angezansi yezwekazi le Africa.
Indizamtshina ezivela kwele South Africa, Namibia, Lesotho, Botswana, eSwatini and Zimbabwe zibikwa sezimisiwe ukungena kweleBhilatani kusukela lamuhla kuthi labo abangenayo bevela kulawo mazwe kuzamele baqale bayehlala lapho abangasoke bahlangane labantu khona kuquarantine, njalo bezokube behlolwa ngesikhathi bekulezo ndawo.
Umqondisi wenhlanganiso eye Community Working Group on Health, uMnu. Itai Rusike. uthi bakhathazekile ngale imibiko yomhlobo omutsha waleli gcikwane.
"Loluhlobo olutsha lwegciwane leli lusilethela inkinga kundlela sizosebenza ngayo njengoba inengi labantu eZimbabwe bengasazilandeli lezo ziqondiso zokuzilondoloza kulolubhubhane ezabekelwa amzwe ngabe WHO kakhulu sibona ukuthi inani labahlatshwayo liphansi kakhulu. Lodaba lwemingcele yethu engalondolozekanga kuzakutsho ukuba inengi lalabo abaseSouth Africa bazakungena kuleli besebenzisa indlela ezingekho emthethweni.”
Lokhu kugcizelelwe ngesinye isakhamuzi sakoBulawayo, uMnu. Cosmas Mathe.
"Akusiphathi kakuhle ukuthi sekulenye njalo enye i-variant esimemetheka kwele South Africa, next door lathi la. Okutsho ukuthi its jus a matter of time ukuthi sizwe ukuthi isikhona lapha njalo njengoba sekuyi Festive Season, anything can happen. Yinto ebuhlungu sibili leyo ngoba besesingani sesijwayele, sesihlatshiwe, njalo amananai ebesesehla, abantu ababanjwa yiyo. Bekukuhle sibili kodwa now, lokhu sekusethusa kakhulu. "
Kodwa uhulumende weZimbabwe uthi kasikho isizatho sokuba uzulu ethuswe yimibiko yokuqhamuka komhlobo omutsha wegciwane leCoronavirus obikwa olulolaka olwedlulise amalawulo.
Ekhuluma emhlanganweni wegcwethi zezempilakahle owe Health Proffessions Authority - HPA 2021 Annual Congress, owenzelwa eHarare, umsekeli kamongameli onguye njalo umpathintambo wezempilakahle uMnu. Constantino Chiwenga uthe kwathi kuqhamuka uhlobo lweDelta kweleSouth Africa kwaba lokuxokozela okufanayo.
"Engifuna ukukutsho khona manje yikuthi uzulu angethuki, ngoba singabalungiseleleyo. Umhlobo omutsha lo wegciwane leli, weB11529 kumele liphange liwodobhe lina njengengcwethi zethu kweze science. "
Uphinde waqonqosela uChiwenga ukuba indlela kuphela engenza uzulu avikeleke kulolubhubhane, yikuhlatshwa ijekiseni lokuzivikela kilo. Kunje sebefinyelela kuzigidi ezintathu - 2 774 929 asebelihlatshiwe ijekiseni lesibili ngemva kokuba abedlula kancinyane inkulungwane eziyisikhombisa - 7 486 belihalatshiwe ekutshoneni kwelanga layizolo.
Emibikweni yabo ephuma nsuku zonke yesimo se COVID-19 elizweni abezempilakahle baveza ukuba sebefika phose izigidi ezine – 3,7 million asebethole ijekiseni lakuqala ngemva kokuhlatshwa kwabafika phose inkulungwane ezingamatshumi amabili – 18,687 izolo.
Abezempilakahle baveza ukuba sebezinkulungwane ezedlula ezilikhulu – 133,774 asebetholakale belalomkhuhlane kuthi abazinkulungwane ezedlula ezilikhulu babo – 128,540 basinda kiwo, abafika phose inkulungwane ezinhlanu – 4,704 kwaba ngabalahlekelwa ngumphefumulo.
Lanxa lingani lilokhe lisasephansi inani lasebevikelekile ngemva kokuhlatshwa kabili uhulumende uthi uzolifinyelela lelonani elidingakalayo ukuba uzulu elizweni kuthiwe uvikelekile lezigidi ezilitshumi - 10million loba isilinganiso sokungamatshumi ayisithupha ekhulwini - 60% kusiyaphela umnyaka.