amalinks wokungena

Breaking News

Ibandla leAfrican National Congress Lithi Lephula Izithembiso Zikazulu Okwenze Abantu Abanengi Bengavoti Lonyaka


FILE: Abantu bathakazelela uMongameli Cyril Ramaphosa.

Ibandla elibusayo kwele South Africa eleAfrican National Congress (ANC) selivumile ukuthi ukwehluleka kwalo ukugcwalisa izithembiso kubavoti yiyo imbangela enze abantu abanengi bangazihluphi ukuvota lonyaka.

Ekhethweni lwezabelo olusanda kuqhutshwa kweleSouth Africa ibandla leANC yilo elithole amavoti amaneni, okwenze lathola amakhansili (municipalities amanengi) azalawulwa yilo. Loba kunjalo manengi amakhansili lapho leli bandla elehluleke ukuthol amavoti azakwenza kube yilo elilawulayo.

Lokhu kutsho ukuthi lelibandla sekuzafuze likhulumisane lamabandla aphikisayo ukuze bebumbe ikhansili yomanyano ozakhokhela lawo madolobho.

Edolobheni leJohannesburg lePretoria ibandla leANC kuzafuze likhulumisane lamabandla aphikisayo ukuze libumbe ikhansili njengoba lingatholanga amavoti ayisilinganiso sokungamatshumi amahlanu lanye ekhulwini (51%). Lelibandla libhekane lesimo esifanayo emakhansilini ambalwa.

Okhokhela ezokhetho kulelibandla umnumnzana Fikile Mbalula uthi kusobala ukuthi imbangela yalokhu yikuthi inengi labantu alizange lizihluphe ngokuvota ngenxa yokwehluleka kwebandla elibusayo ukuletha izinto ezifana lezindlu, amanzi, amagetsi lakho konke okunye okudingwa nguzulu empilweni.

Loba kunjalo abavotele ibandla leANC Abafana lomnumnzana Silas Dlamini bathi ngeke bavotele elinye ngaphandle kwayo.

Ibandla leDemocratic Alliance yilo elibengelesibili kulolukhetho kantike loba lenelisile ukunqoba njalo edolobheni leCape Town lapho ebelikhokhela khona.

Ele Inkatha Freedom Party yilo elesithathu nxa kukhangelwa amabandla athole amakhansili amanengi.

Inengi lamabandla amancane anqobile ezikhundleni zamakhansila amanengi kodwa ngamanani angeneliyo ukuthi kube yiwo akhokhela amakhansili lawo.

Lobanje kungekho izikhalazo zokuqilibezela kulolukhetho, kunengi amabandla aphikisayo akhala ngazo. Bakhona abakhonona ngokungasebenzi kuhle kwemitshina ebesetshenziswa ukuvota.

Ukwehla kakhulu kwenani labavotileyo lakho sekulethe ukukhathazeka ngemva kokutholakala kokuthi phakathi kwabedlula izigidi ezingamatshumi amabili lesithupha (26 million) ababhalisele ukuvota kuvote abangaphansi kwenye yalelo nani (12,2 million.)

Isizalwane seZimbabwe unkosazana Sthele Mazwi uthi abakuncoma kakhulu bona zindlela okuvotwe ngayo.

Leyinto egcizelelwa ngesinye isizalwane seZimbabwe, uMnu. Nceku Moyo.

Loba kunjalo inengi lezizalwane zeZimbabwe sezincome kakhulu lolukhetho lendlela okubalwa ngayo amavoti. Bathi ukuthi akukabi khona ibandla elithi lisola ukuqilibezelwa kutsho khona ukuthi abukho ubuqili.

Inengi lithi lithokoziswa yikuthi akuzange kube lezehlakalo zodlakela loba ukuxotshwa kwabameli bamanye amabandla ngesikhathi kubalwa amavoti.

Bathokoziswa njalo lokuthi akubotshwanga muntu webandla eliphikisayo njengalokhu okuvame ukwenzeka eZimbabwe.

Facebook Forum

XS
SM
MD
LG