amalinks wokungena

Breaking News

'Lokhe Sibophisa uNkosikazi Grace Mugabe Owatshaya uGabrielle Engels'


FILE: UNkosazana Gabriella Engels okuthiwa watshaywa ngoNkosikazi Grace Mugabe kwele South Africa, Aug. 17, 2017.

Inhlanganiso yakwele South Africa elwela amalungelo eye Afriforum, emele uNkosazana Gabriella Engels okuthiwa watshaywa nguNkosikazi Grace Mugabe, ithi iqhubekela phambili ngemizamo yokuthi uNkosikazi Mugabe abotshwe lobanje angasenguye mka mongameli welizwe.

Inhlanganiso le ithi loludaba luyabuyela emthethwandaba ngoNkwenkwezi.

Umkhokheli wenhlanganiso yeAfriForum, uMnu. Kallie Kriel, utshele iStudio 7 ukuthi uNkosikazi Mugabe wetheswa icala lokutshaya uGabriella Engels, hatshi ngoba engunkosikazi walowo owaye ngumongameli, uMnu. Robert Mugabe, kodwa ngenxa yokuthi wadala icala elidinga ukuthi ajeziswe.

“Sizimisele ukwenza konke okusemandleni ethu ukubona ukuthi uNkosikazi Grace Mugabe uyajeziswa ngodaba lokutshaya unkosazana Gabriella Engels. Sizabe sisemthethwandaba weHight Court e Pretoria mhlaka 10 lamhlaka 11 ngoNkwenkwezi, sifaka isicelo sokuthi umthethwandaba wesule isivikelo sokungabotshwa esanikezwa uNkosikazi Mugabe, ukuze azothonisiswa ngecala lakhe eSouth Africa.”

Lelinyathelo le Afriforum selivuse imbono ehlukeneyo kuzizalwane zeZimbabwe.

Omunye wazo, uMnu. Khulekani Dube, uthi ukuthonisiswa kuka Nkosikazi Mugabe ngecala alidala kwele South Africa kuzakuba yisibonelo esihle kwabezombusazwe eZimbabwe, ukuthi linto yokwephula amalungelo oluntu mahlayana eZimbabwe, ngeke bahambe bebukwa ngayo lakwamanye amazwe.

“Ngibona kufanele ukuthi i Afriforum iqhubeke ngaleli cala ngoba akekho umuntu olelungelo lokutshayanje umuntu. Nxa umuntu ekonele kufanele umbophise kumbe umuse emthethweni. So lokho akwenzayo yikudelela plus elizweni labanikazi. Ujwayele ukukwenza elizweni lakithi ngoba awethu amalungelo basiphuca wona so bayakwazi ukwenza loba yini phezu kwethu sebethatha lelo thuba bezolisebenzisa kwezinye indawo.”

Kodwa esinye isizalwane seZimbabwe, uMnu. Greatman Mkhwebu, uthi akasiboni isizatho sokulandelela uNkosikazi Mugabe ngaloludaba.

Uthi okusemqoka yikuthi unkosikazi Mugabe wayekhuza abantwana njengomuntu omdala ngakho inhlanganiso yeAfriForum kayekele ukugxamukela kuloludaba.

“Mina ngombono wami ngibona ukuthinje badlala ngesikhathi laba abantu. Angazi lokuthi bazama ukwenzani ngoba eqinisweni mpela angiboni lokuthi umfazi kaMugabe wayengayisukelanje ayishaye lintombazana ingonanga lutho ngoba ngumuntu omdala lowana. Kanti why bengaqhamuki lento sizwe ukuthi isisusa yini ngoba njalonje sonke isikhathi akuveli ukuthi intombazanale ize itshaywe yayitshayelwani.”

UMnu. Kriel uthi lobanje uNkosikazi Mugabe engasenguye nkosikazi kamongameli welizwe, akulula ukuthi abotshwe ngalelo cala nxa engangena kwele South Africa kungakakhitshwa isivikelo sokungabotshwa asiphiwayo.

Uthi nxa leso sivikelo singasuswa kutsho ukuthi uNkosikazi Mugabe ngeke esangena kwele South Africa ngoba angavele angene uyabotshwa athonisiswe.

Facebook Forum

XS
SM
MD
LG