amalinks wokungena

Breaking News

Human Rights Watch: Ilizwe leSouth Africa Liphehla Udlakela Lokuhlasela Abantu Bokuza


Inhlanganiso ebona ngezokulondolozwa kwamalungelo kazulu eyeHuman Rights Watch ithi uhulumende wakwele South Africa lamapholisa bayingxenye yabaphehla udlakela lokuhlasela abantu bokuza olweXenophobia.

Inengi lezizalwane zeZimbabwe zithi ziyavumelana lalo umbiko othi kunengi okwenziwa ngamapholisa, imithethwandaba lezisebenzi zikahulumende okukhombisa ukuthi labo balawo lumoya wokucasana ngobuzwe.

Isizalwane seZimbabwe, uMnu. Greatman Mkhwebu, uthi zinengi izehlakalo ezikhombisa ukuthi kukhona okuisolisayo.

“Okwakuqala utholukuthi bakuthola esitaladeni ungelaphasipoti ubatshele ukuthi uyikhohlwe endlini. Abakuphi ithuba lokuthi uyilande endlini ngoba befuna ukukubopha vele. Njalo ungaze uthi uyiphethe leyo phasipoti kunzima ukuthi ubaphe ngoba bayayifihla kumbe bayilahle bakubophe. Ngoba lasepolice station vele bazathi lumuntu ubengelamaphepha ngakho awulamandla okuphikisa. Uqaphele futhi sonke sikhathi nxa kulomsindo kuhlaselwa amabantu bangaphandle bazakumale bekele amaSouth Africa atshontshele ahlasele abantu.”

Ngokutsho kwalo umbiko, amaphosa akwele South Africa kawenzi umsebenzi ngokugcweleyo ngesikhathi abakwamanye amazwe behlaselwa kudlakela lwexenophobia kusukela ngo2008.

Kwezinye izehlakalo amapholisa abesala ukusiza abakwamanye amazwe nxa behlaselwa. Kwezinye njalo atholakele ebopha abakwamanye amazwe abalamaphepha okuba selizweni ngokusemthethweni kodwa bebavalele okwamalanga besithi basahlola ukuthi amaphepha abo ngaweqiniso na.

Ukungenelwa ngodli kwabakwamanye amazwe yiziphathamandla zogatsha lwendaba zasekhaya lamapholisa emisebenzini, ezindlini, lezitolo zabo kudingwa abaselizweni ngokungekho emthethweni ngenye yendlela etholakele ukuthi iyafana lokumemethekisa loludlakela.

Kutholakele njalo ukuthi ugatsha lwendaba zasekhaya luyehluleka ukunikeza imvumo kuziphepheli ngesikhathi, okwenza zicine seziselizweni ngokungekho emthethweni okuyikho isisusa sokuhlaselwa kwabo.

Omunye wabebeyingxenye yokwethulwa kwalo umbiko, uMnu. Vusumuzi Sibanda, uthi amapholisa, uhulumende lemithethwandaba abekho msulwa kuloludaba.

“Uhulumeni, amapholisa kanye lenkantolo bayathinteka ekuhlaselweni kwabantu bokuza ngoba bakhuluma ngale indlela edala inzondo exabanisa abantu bokuza lezizalwane zakweleSouth Africa. Utholukuthi ungqongqoshe wezimali ubekhononda ngokuthi abangtu bokuza sebethethe imisebenzi yonke nedaweni zokudlela. Uthole ungqongqoshe wezemisebenzi ekhaya ngokuthi abatshayeli bamaroli abanengi babuya ngaphandle.”

Olobe lumbiko isphathamandla senhlanganiso yeHuman Rights Watch unkosazana Kristi Ueda, uthi uhulumende weSouth Africa wehlulekile ukubona ukuthi uhlelo lokuqeda ixenophobia olwavunyelwana ngo 2019 luyalandelwa ngokugcweleyo.

Loluhlelo lukhuthaza ukufundiswa kabanzi kwezisebenzi zikahulumende lozulu ngemithetho alawula ukuza kwabantu kwele South Africa, ukunikezwa masinya kwencwadi zemvumo yokuba selizweni kanye lokubotshwa lokugwetshwa kwalabo abahlasela abakwamanye amazwe.

Umnumnzana Sibanda uthi uhulumende wazi mhlophe okufuze akwenze.

“Kungakho sithi indlela okusetshenzwa ngayo ikhomba sobala ukuthi amalungelo abantu bokuza ayahlukumezeka and kwenziwa kakhulukazi nguhulumeni. Lasezinkantolo utholukuthi labakhalaza ngebail abayitholi ngenxa yokuthi baphuma ngaphandle. Kanti lenkulumo ezisuka kulaba abaphethe inkantolo omantshi namajaji zisuka zikhombe khona ukuthi inzondo iningi kulaba abantu bokuza.

Lumbiko ukhuthaza uMongameli Cyril Ramaphosa ukuthi aqakathekise ukulandelwa kohlelo lokulwisa ixenophobia olwavunyelwanayo njalo akwenze kube lula ukuthi abakwamanye amazwe abahlukunyezwe yiziphathamandla zikahulumende bakubike lokhu kwabezomthetho.

Facebook Forum

XS
SM
MD
LG