amalinks wokungena

Breaking News

Bathukuthela Abantu Emazweni Atshiyeneyo Ngokukhahlanyezwa Kwabantu Bokuza Kwele South Africa


Abadaduka kwele Nigeria babamba omunye umuntu obetshontsha esitolo sabo eJohannesburg kwele South Africa.

Lobanje kungazange kube lezehlakalo zokuhlaselwa kwabakwamanye amazwe kumbe ukuthathelwa impahla yabo kwele South Africa ngoLwesithathu, izizalwane zamanye amazwe kuzwekazi leAfrica kubikwa lazo seziqalile ukuhlasela lokuthatha ngodlame impahla yamankampani akwele South Africa emazweni azo.

Ukuhlukunyezwa kwabakwamanye amazwe kwele South Africa, ukutshontshwa lokutshiswa kwempahla yabo sekutshiye izihlobo zabo emazweni abo zibhubhudla amagwebu ngolaka.

Izizalwane zakwele Zambia ngoLwesithathu zingene ngenkani esitolo sabadabuka kwele South Africa esithengisa ukudla.

Kwele Nigeria imifanekiso ephume kuTwitter ibikhombisa izizalwane zakulelo lizwe zihlasela inkampani yakwele South Africa ethengisa ukudla leyinye ekunhlelo zabomakhalekhukhwini lezokuxhumama.

Ngaphambilini umphathintambo wogatsha lwezangaphandle kweleNigeria wethule umbiko esithi kubi kakhulu okwenzeka kwele South Africa njalo bazakuthathela amanyathelo. Kungakapholi amaseko besebebize omela ilizwe leSouth Africa kwele Nigeria bekhonona ngokuhlaselwa kwezizalwane zabo.

Isiphathamandla sewofisi yeNigeria kwele South Africa, uMnu. Godswin Adama, ubevele wakubeka kwacaca ukuthi bazathatha amanyathelo.

“Akekho umuntu kugoqela lami okungathi abantu bakhe belahlekelwa yimpahla yabo abayisebenzele nzima atholakale ethokoza.”

Kusenjalo, omongameli bamazwe agoqela eleDRC, iMalawi, iRwanda leNigeria labo kubikwa sebethe abasabuyi emhlanganweni weWorld Economic Forum oqhutshelwa kwele South Africa, okulinyathelo elikhombisa ukuthi abaphathekanga ngokuhlukunyezwa kwabantu babo kwele South Africa.

Lamanyathelo asemukelwe ngendlela eyitshiyeneyo yizizalwane zeZimbabwe.

UMnu. Bongani Nyathi uthi yizenzo ezikhombisa intukuthelo ngalokhu okwenzalakayo.

“Kubonisa ukuthi izizalwane sezizenzela zona ngoba zicabanga ukuthi abaphathi bethu sebeyekelele kakhulu iSouth Africa iqhubeka ngalo umkhuba wokuhlasela abantu bangaphandle. Yindlela abantu abatshengisela ngayo ukuthi ohulumende bethu akubekhona abakwenzayo.”

UMnu. Mlungisis Tshabalala yena uthi ukuphindisela akusiso sisombululo.

“Siyakugqibela phansi sithi hayi akusikho kuphila kwama Africa. Sicela ukuthula eAfrica yinto esiyigquqguzelayo ebantwini ukuthi hayi sicela ukuthi loba benze ububi obungakanani ngapha lani lingaphindiseli ngobubi.”

Facebook Forum

XS
SM
MD
LG