amalinks wokungena

Breaking News

Izizalwane zeSouth Africa Zithakazelela Ukususwa Kuka Mugabe Esikhundleni


Amalunga ebandla leEconomic Freedom Fighters.

Izizalwane zakwele South Africa, inhlanganiso zikazulu lamabandla ezombusazwe sebetshayele iZimbabwe ihlombe ngokwenelisa ukuthi uMnu. Robert Mugabe ehle esihlalweni kungela gazi elichithekileyo.

Kusehlakalo esitshengisa ukuthi uhulumende weSouth Africa ulitshayela ihlombe ikhono labantu beZimbabwe lokutshintsha umongameli kungelakulwisana, okhangelelwe ukungena esikhundleni sikamongameli weZimbabwe uMnumnzana Emmerson Mnangagwa, wethekelele uMongameli Jacob Zuma engakabuyeli eZimbabwe ngoLwesithathu.

UMongameli Jacob Zuma.
UMongameli Jacob Zuma.

Lobanje kungavezwanga okunengi abakhulume ngakho, lelinyathelo likhombisa ukuthi uhulumende weSouth Africa usuthisekile ngendlela okuqhutshwe ngayo ukwehla kukamongameli Mugabe esihlalweni.

Ihofisi kaMongameli Zuma imemezele ukuthi uhambo lwakhe lokuya eZimbabwe obeluqoqwe ngesikhathi uMongameli Mugabe engakatshiyi umsebensi alusezukuba khona.

Unobhala jikelele webandla elibusayo kweleSouth Africa, uMnumzana Gwede Mantashe, uthi iyancomeka indlela iZimbabwe esombulule ngayo inking zayo.

“Kufanele sincome ukuzibamba okwenziwe ngabantu beZimbabwe. Ngenxa yokuthi akuzange kubekhona ofayo, ukubhidlizwa kwempahla, kwaba lokutshengisela okulokuthula. Kithi lokhu yinto esipha ithemba.”

Kusenjalo, okhokhela amalunga ebandla le African National Congress ephalamende, uMnumnzana Jackson Mthembu, uthi ibandla labo lingafunda okunengi eZimbabwe njengoba lalo liyidinga inguquko kunkokheli zayo.

Amabandla aphikisayo kweleSouth Africa lawo asetshayele iZimbabwe ihlombe. Ibandla le Economic Freedom Fighters lithi ngokwakuqala emhlabeni jikelele ukuthi ibutho lincedise ukukhipha umongameli welizwe esikhundleni kodwa kungachitheki gazi.

Amalunga ebandla leAfrican National Congress.
Amalunga ebandla leAfrican National Congress.

Umgcinisihlalo waleli bandla uMnumnzana Dali Mpofu uthi abakhokheli abangenayo yibo asebesalelwe ngumsebenzi omkhulu.

“Okuqakathekileyo yikuthi kube yinguquko ebe lokuthula. Ngilethembake lokuthi ubukhokheli obutsha, kumbe buzoqala ngokhetho, kumbe buzaqala ngomanyano. Lezi ngezinye zezinto uhulumende weZANu PF okufanele azibheke.”

Ngakoluhle uhlangothi ibandla le Democratic Alliance lona lithi okwenziwe yiZimbabwe yisifundo esikhulu emazweni onke asezansi yezwekazi leAfrica.

Ibandla leSouth African Communist Party lona lithi okwenzakale eZimbabwe kupha isifundo sokuthi amazwe kufanele aqaphele omongameli bengaphiwa amandla angelamkhawulo.

Ngasikhathi sinye injabulo lesibongo kuqhubekela phambili kuphuma kuzizalwane zeZimbabwe. Inengi lisithi kunzima ukukukholwa ngempela ukuthi uMnumnzana Mugabe usebeizwa ngokuthi owangengumongameli welizwe.

usomlomo wedale lephalamende uMnu. Jacob Mudenda wethula umbiko wokuthi uMugabe setshiye umsebenzi.
usomlomo wedale lephalamende uMnu. Jacob Mudenda wethula umbiko wokuthi uMugabe setshiye umsebenzi.

Isizalwane seZimbabwe uNkosazana Nonhlanhla Ndlovu uthi kungathi uphakathi kwephupho elide.

“Li li li li! Siyabonga! Sibonga kakhulu amasotsha loChiwenga. Kungayisikho lokhu aluba lento ayenzekanga.”

Le yinto egcizelelwa nguMnumnzana Mlungisi Tshabalala yena othi labo abangenayo bengenza njengomongameli Mugabe sebekwazi ukuthi bazawukhomba olotshwala.

"Isisfiso sami yikuthi uMugabe aphile aze abe le 200 years ebuka ukuthi abantu babuswa njani, abantu banikezwa njani ithuba lokuthi bekhululeke elizweni labo."

Kusenjalo, uhulumende weSouth Africa useyilandule imibiko ebisithi uMongameli Mugabe usecele ukuphephela kulelo lizwe.

please wait

No media source currently available

0:00 0:03:16 0:00

Facebook Forum

XS
SM
MD
LG