amalinks wokungena

Breaking News

Abadabuka eZimbabwe Abahlala eSouth Africa Bemukela Ngenjabulo Ukuyekethiswa Kwemigoqo Yokwenqabela Ukumemetheka kweCOVID-19


Izizalwane zeZimbabwe sezemukele ngenjabulo ukuyekethiswa okukhulu kwemigoqo yokwenqabela ukumemetheka kwecoronavirus kwele South Africa.

Izizalwane zeZimbabwe zithi ukuyekethiswa kwemigoqo yokwenqabela iCOVID-19, kuzabapha ithuba elihle lokuqhubeka ngempilo kungekho okubaphazamisayo.

Ngokwemithetho emitsha, abantwana besikolo bonke bazaqala ukufunda malanga wonke kusukela ngoMvulo.

Imithetho ebilawula ukusondelelana kwabantwana isiyesulwe.

Umuntu osehlaselwe ngumkhuhlane wecorona kodwa engelazibonelo, akusadingeki ukuthi ayezivalela endlini kodwa uselelungelo lokuya emsebenzini enjalo lokwenza loba yiphi imisebenzi yakhe yosuku.

Ohlaselwe yilo umkhuhlane, olezibonelo zalokhu ukhangelelwe ukuzivalela endlini okwensuku eziyisikhombisa kuphela hatshi ezilitshumi njengalokhu obekusenzeka.

Kungaze kube lobufakazi bokuthi uhlangene lomuntu olecoronavirus akusadingeki ukuthi uzivalele endlini nxa kungelazibonelo zokuthi lawe usulayo.

Abantu sebengahamba kuze kuse njengoba usukhitshiwe umgoqo owenqabela ukuhamba kwabantu.

Umphathintambo ehofisini kamongameli, uMnu. Mondli Gungubele, uthi lokhu kwenziwe ngemva kokunanzelela ukuthi luyehla ulaka lokumemetheka kwecoronavirus elizweni.

“Lokhu sikwenza ngoba kulobufakazi bokuthi inengi labantu selilawo amasotsha okuzivikela kucoronavirus.”

Inengi lezizalwane zeZimbabwe lithi lezi zindaba ezimnandi kakhulu. Abanengi balahlekelwe yimisebenzi ngenxa yale imigoqo eyethulwe kusanda kuqala u2020.

Abazisebenzayo labasebenza endaweni zokudlela besekusiba nzima ukuthola imali ethexaxa njengoba limigoqo ibisenza kube nzima ukuthi abantu baphume ezindlini bayekudla kulezi indawo.

Isizalwane seZimbabwe, uMnu. Mlungisi Tshabalala, uthi sekusobala ukuthi vele abantu bazaphila layo icorona okwesikhathi eside.

“Sekuyisikhathi sokuthi sibhekane nayo ngqo icovid. Abantu sokufanele beqale manje ukuthi beqhubeke ngempilo zabo. Abantwana besikolo bebuyele esikolweni befunde. Sesiyathembela khona ukuthi begqoke ama mask ukwenzela ukuthi befunde. Umuntu kakwazi ukuthi ulayo isanithayiza unayo imask. Sanitize yourself everytime ngoba impilo kuzafuze iqhubeke.”

Abanye bathi lokhu kuqakathekile njengoba kungumnyaka wokwethekelela amahofisi kahulumende amanengi kulandela ukumiswa kokusebenza kwamapermit abo.

Abaculu labanye abaphila ngokuthokozisa umphakathi bathi kuzabavulela amathuba okusebenza.

Inani labahlaselwa yicoronavirus kweleSouth Africa ngelanga selidlalela kuzinkulungwane ezinhlanu okulinani elehle kakhulu nxa kukhangelwa ukuthi bake bafika kuzinkulungwane ezilitshumi lesithupha (26,000). Ababulawa yilo umkhuhlane ngosuku badlalela phansi kwamakhulu amabili (below 200).

Abavalelwa esibhedlela ngosuku bahambela kukhulu (100). Phakathi kwabedlula izigidi ezintathu lengxenye - 3,6 million asebehlaselwe yicoronavirus selokhu yaqalayo inengi selasila, kwafa abedlula izinkulungwane eziyisitshiyagalolunye lengxenye (95,000) kantike abalokhu begula ngalo umkuhlane ngokwesibalo sayizolo bedlula kancane izinkulungwane ezingamatshumi amathathu lengxenye (55,856).

XS
SM
MD
LG