Abantu abanengi bancoma okwenziwe ngabantu abancedise abadabuka eMatabeleland leNkabazwe abahambe eHarare ngeviki ephelileyo besiyadinga indawo yokuba ngabongi labongikazi.
Bathi muhle kakhulu umsebenzi owenziwe nguDiscent Collins Bajila, uMlungisi Dube, Michael Ndiweni, Samukeliso Khumalo, Effie Dlela Ncube labanye ababambisane ngendlela ezitshiyeneyo ukwenzela ukuthi abaphutsha kahle izifundo zabo bangene ebulenjini beInternet badinge indawo zokuba ngabongi njalo baye eHarare lapho okukhethwa khona obafuna ukwenza izifundo lezi.
Inengi labafika ikhulu lengexenye – 150 – yalabo abancediswe ukudinga indawo, ngabantu abangenelisi ukungena ebulenjini beInternet lokuba lemali yokuya eHarare.
UBajila uthi kuyabukeka ukubona abantu bebambisana ukwenzela ukuthuthukisa labo abaswelayo.
Uthi ilizwe leZimbabwe lingaguquka nxa abantu bedonsa ndawonye.
UNdiwebu loDube bagcizelele besithi basebenze gadalala besenzela ukuthuthukisa abantu abadabuka eMatabeleland leNkabazwe.
Abanye abathole uncedo, abagoqela uKhanyi, bathi sebemelele ukuzwa ukuthi kuzaphumani kulokhu abakwethulela abaqhatsha abongi labongikazi.
