amalinks wokungena

Izizalwane zeZimbabwe Ezihlala eBhilithane Zivalelisa Isikhathi Sehlobo


Bakholise okumangalisayo abantu eBhilithane ngempelansonto.

Isikhathi sokutshisa eBhilithani siyasisobela njalo umqando usuqoqoda osokukhomba ukuphela kwezikhathi ezimnandi zamawoso enzakala maviki wonke ngeSonto kulelolizwe.

Ngesikhathi sokutshisa izizalwane zeZimbabwe ezigoqela abadala, abatsha labantwana zihlangana maviki wonke emadolobheni atshiyeneyo eNgilandi, kuwoswa inyama kudliwa, abantu bezijabulisa ngemiculo ehlukeneyo yezwekazi leAfrica.

Bekudliwa njalo kunathwa santando embuthanweni lo.
Bekudliwa njalo kunathwa santando embuthanweni lo.

Embuthanweni le, kuba lemidlalo etshiyeneyo efana lenguqu, volleyball leminye nje imdlalo yokuzilibazisa enjengokucula lokhu abathi yi-karaoke kukanti abatwana labo baleyabo imidlalo efana lamajumping castle.

Isikhathi somqando sitsho ukuphela kwakho konke lokhu ngoba lezindawo zokuhlanganela ziyavalwa zize ziyevulwa ngomnyaka ozayo ngesikhathi sokutshisa njalo.

Impelansonto yokuqala kuMfumfu ibingeyokucina ukuwosa lonyaka njalo abantu abanengi bakhala ngesizungu abazaba laso ngesikhathi somqando.

UNkosazana Nonhlanhla Ndlovu, obehamba lemuli yakhe, ngomunye obesemawosweni awePanzvimbo edolobheni leSlough.

“Hayi yona siyibonile iSummer sibili, nansiyana kodwa isitsholobela. Kodwa kungasenani sikholisile kusiphile ithuba lokuthi kesiphume labantwabethu siyekwejisa labangane lezihlobo ngoba sokulezindawo ezinenginengi lapha eNgilandi lapho esikwejisa khona indawo zakithi ezeAfrica lapho esifika silalele khona ingoma zakithi ezeAfrica zisenza sizizwe singabantwana baseAfrica, abeZimbabwe.

Bakugcwele abantu abazekholisa ...
Bakugcwele abantu abazekholisa ...

“Lani loba nje isummer yakhona ibemfitshane kithi lapha especially lapha e-up North, kodwa hayi sikholisile. Besikwazi futhi lokuthi siphume siyekwezinye indawo ezinjengabo Dunstable ezinjengaboSlough lapho ilanga ebelihlala likhona ezikhathini ezinengi, bekumnandi.”

Omunye olendawo yamawoso eseBirmingham okuhlanganela khona amaZimbabwe okuthiwa eKhaya, uMnu uAnele Xaba, uthi uzulu ukholise ukuthunqisa intuthu, ukuvala amawoso alonyaka osokusitsho ukuba ubunandi buphelile.

“He! He! He! hayi ubunandi du nya finish, siyabonga msakazi, isummer yeyi. Hayi yaphela elizweni likaQueen sesilinde sona isnow sakhona lesi mayebabo. Kodwa ke kungasenani, sikholisile, sikholisile bafowethu, liziphathe kahle, lizigcine kahle, sihlangane next summer again.

Nampa abanye abakholise okumangalisayo ...
Nampa abanye abakholise okumangalisayo ...

“Bekumnandi kunjalo, hayi okwamanje eUK lapha sokushikishwa madoda sesishikishela nje ukuthi next summer sibemnandi, sikholise njalo njengalokho ukukholisa esikwenzileyo manje, kuyabongeka bafowethu.”

UNkosazana Dorothy Moyo laye ubewosa inyama eLeeds Sunday BBQ labangane bakhe. Yena uthi baphume ngobunengi ukuthi bayewosa okokucina bavalelise isikhathi sokutshisa.

“Bekulilanga lokucina lesummer. Sithi sikholise ukuwosa nje okokucina nje lamhlanje njengoba nje umqando usubuya, ha sikholisile sibili. Sesizase sikubone ngomnyaka ozayo, sibone nje laba abasiwoselayo. Bekukuhle.

Yebo kambe uzulu uyazithanda lezindawo zokuzohlanganela kudliwa kodwa kukhona abasoloya ngokwenzakala kulezindawo. UMnunzana Dingilizwe Fuzwayo, owaziwa ngokuthi nguBra Bhudasi, uthi kuhle ukuba lendawo zokukholisa abantu bendawonye kodwa endaweni lezi kulonyeyo kakhulu, osokudilize imizi.

Thisa nyama ... Bawosa inyama abasendaweni yokukholisa.
Thisa nyama ... Bawosa inyama abasendaweni yokukholisa.

“Isummer isiphelile, iphelile nje isummer iphela lobunandi bonke obuyabe bukhona ngesummer umqando sufikile. Kodwa sizake siphumile ukunyeyana okusemaphathini lapha lokuqalisa ubuzanka babantu hayi iUK mani, sizakuthini. Ayihambe isummer siyaze siyeyibona next season.

“But hayikhona sikholisile imizi ichithekile, abanye bathole imizi khonaphana kodwa hayi, sesiyangena emqandweni, sesibuyela emashiftini, sokusetshenzwa futhi njalo. Ubunandi siyaze siyebubona khona next year, siyabonga.”

Indawo zamawoso kweliNgilandi zenziwa ngesikhathi sokutshisa kuphela, lapho ilanga elitshisa likhiphe inhlanzi emanzini, yiso isikhathi izizalwane zeZimbabwe eziphuma ngobunengi zisiyahlanganela ndawonye zichitha isizungu, ziqolotsha, zijabula, kuxoxwa, kuxokozelwa, kudliwa njalo kugidwa.

Yiso isikhathi esibakhumbuza ekhaya nanku ngokuqala kwenyanga kaMfumfu umqando susithi qoki manini kancane.

Facebook Forum

XS
SM
MD
LG