Inhlanganiso yabasakhulayo eyeYouth Forum of Zimbabwe ithi uhlelo lokwabele uzulu amashares amankampani emazweni olwe indigenization soluqambulwe ngabantu abanothileyo.
Umqondisi wenhlanganiso le, uMnu. Wellington Zindove, uthi inengi lalabo abangena kuhlelo lolu yilabo abathola amapulazi kusabiwa umhlabathi lezinye inhlelo zikahulumende.
UZindove uthi lokhu sokwenze ukuthi inhlanganiso yakhe ibize umhlangano omkhulu lamuhla ntambama wokuthungatha indlela ezitshiyeneyo zokuphatha uhlelo lolu.
Uthi abakhangelelwe ukuba semhlanganweni lo ngabaqondisi bamankampani lenhlanganiso ezizimele zodwa, iziphathamandla zedolobho leHarare, abamele amadale ephalamende kanye labantu makhaza.
UZindove uthi sesifikile isikhathi sokuthi uzulu aqhube uhlelo lolu ngendlela eqondileyo. Amankampani emazweni kumele abele uzulu amashares ayisilinganiso sokumatshumi amahlanu lanye ekhulwini – 51 percent.
Banengi abaluchothozayo uhlelo lolu besithi luvalela ukuthi osomabhizimusi bemazweni bengavuli amafekithali kwele Zimbabwe ngokwesaba ukuthi bazawathathelwa nguhulumende.
Ukuze sihlaziye udaba lolu, sixoxe loMnu. Bekezela Nkosana, osedolobheni lakoBulawayo, othe abantu abanengi kabalwazi uhlelo lolu.