amalinks wokungena

Breaking News

Ibandla le Zanu PF Litshiya Uzulu Etshelwe Ngamathe Kukhetho


Impumela yokhetho engakethulwa yonke yikhomishini ebona ngokutqhutshwa kokhetho eye Zimbabwe Electoral Commission (ZEC), iveza ukuba ibandla le Zanu PF liyanqoba phose ezabelweni zonke zelizwe.

Esanda kutholakala imibiko ngabakade belalele emsakazweni weZimbabwe Broadcasting Corporation iveza ukuba phakathi kwezigaba ezingamatshumi amabili lathoba minwembili-28 ezingamatshumi amabili lanhlanu-25 zithethwe ngabe Zanu PF, iMDC ekhokhelwa nguMnumzana Morgan Tsvangirai yathola ezintathu kuphela.

Imbiko etshiyeneyo itshengisa ukuthi ibandla leli lithola amavoti amanengi okumangalisayo eMasvingo, Manicaland, Matabeleland South lezabelweni zonke ze Mashonaland. .

Kutshengisa njalo ukuthi iZanu PF ithola amavoti amanengi enkabazwe le Matabeleland North. Ibandla le MDC-T libikwa lilakho ukuba lamalunga amalutshwane edale le phalamende, ele senate kanye lakumakhansili ezabelweni zonke zelizwe.

Abenhlanganiso ye zimbabwe election support network bathi amalunga abo abebona ngokuqhutshwa kokhetho bathi lanxa ukhetho luqhutshwe ngokuthula lokho akutsho ukuba luqhutshwe ngendlela.

Ngakwelinye icele le MDC elikhokhelwa nguMnumzana Welshman Ncube lalo lithi lolu khetho aluqhutshwanga ngemfanelo.

Umnu. Nhlanhla Dube isikhulumeli secele le MDC ekhokhelwa nguNcube uthi okwamanje basahlolisisa imbiko yokhetho evela ezabelweni zonke zelizwe.
Umnu. Buletsi Nyathi oncintisa kukhetho lwekhansili eGwanda uthi kuyadanisa okade kusenzakala edolobheni leli.

Esikhulume labo ezigabeni ezitshiyeneyo zelizwe bathi bamangele ngokunqoba kwebandla leZanu PF endaweni ezazakala njengensika yeMDC.

Bathi kuyabamangalisa ukuthi lokhu kwenzakale njani. Sixhume umqondisi weBulawayo Agenda uMnu. Thabani Nyoni othe amalungiselelo okhetho agoqela ukubhaliswa kwabantu, vele kazange aqhutshwe kuhle.

Izizalwane ze Zimbabwe ezihlala kwamanye azo lazo ziyakhala ngokuqhubeka kombuso webandla leZanu PF.

Abanye bathi bebekhangelele ukubuyela ekhaya alubana iMDC ibithe yanqoba, kodwa bathi ngempumela esikhona, akuselathemba.

Ingcwethi kwezombusazwe uDr. Brilliant Mhlanga uthi lanxa kungaba kube lokuqilibezela, impumela uveza ukuthi iZanu PF isalabasekeli.
XS
SM
MD
LG