amalinks wokungena

Breaking News

Ibandla Lama Democrats Linqoba Elama Republicans Kukhetho Lwedale leHouse of Representatives


Ibandla lama Democrats kwele Melika selibambe xhaka idale leHouse of Representatives kulandela ukhetho olwenziwe ngoLwesibili.

Idale leli belingaphansi kwebandla lama Republicans elikhokhelwa okwamanje nguMongameli Donald Trump.

Ibandla leli lenelise ukuvimba ama Democrats ukuthi anqobe kukhetho lwamalunga edale leSenate. Ibandla lama Republicans lihluthunele elama Democrats ezinye izihlalo zedale leSenate njengalokho akade kukhangelelwe.

Kodwa-ke ibandla lama Democrats lenze kahle kukhetho lwamalunga edale leHouse of Representatives.

Bekudingwa amalunga edale leli angamakhulu amane lamatshumi amathathu lanhlanu – 435. Kudale leSenate bekudingwa amalunga angamatshumi amathathu lanhlanu – 35 – phakathi kwabalikhulu abangena kudale leli.

Abanye abanqobileyo abebandla lama Democrats bagoqela uAmy Klobuchar owe Minnesota loElizaberth Warren weMassachusetts abakhangelelwe ukuthi bangancintisa kukhetho lukamongameli ngomnyaka ka2020.

Kulamanye amalunga ebandla lama Democrats endaweni ezinjenge Indiana, Missouri leNorth Dakota abanqotshwe kukhetho lolu.

Ukhetho olukhangelwe ngamehlo abomvu eFlorida oluphakathi kukaMnu. Bill Nelson (Democrat) loMnu. Rick Scott belugobhozisa amathe ngakho-ke akukaphumi kahle ukuthi ngubani ozanqoba.

Ukunqoba kwebandla lama Democrats edale leHouse of Representatives kutsho ukuthi ibandla leli lizavimba ezinye inhlelo zikaTrump ezingathakazelelwa ngabanye abantu.

Ibandla leli lilakho njalo ukuthi licubungule uhulumende kaTrump ngakho konke akwenzayo okugoqela ukulwisana labantu bokuza.

Abantu abanengi bathi ukhetho lolu luveza ukuthi uzulu kathakazeleli ezinye inhlelo zikahulumende kaTrump.

Amalunga ebandla lama Democrats akhala ngohlelo lwezempilakahle kuthi abasekela ibandla lama Republicans bakhuthele kwezabantu bokuza.

Facebook Forum

XS
SM
MD
LG